A parlamentaria defendeu unha lexislación laboral propria de Galiza e instou a Xunta a plantar cara o Goberno central contra aquelas decisións que prexudican gravemente á clase traballadora galega
Pleno.- A deputada do BNG, Montse Prado defendeu hoxe unha proposición non de lei para reclamar competencias plenas e soberanas en beneficio da clase traballadora galega.
A parlamentaria defendeu unha negociación colectiva propia galega e non seguir dependendo de convenios estatais en sectores que nada teñan a ver coa nosa realidade, manifestou.
Asemade, denunciou que a situación de extrema pobreza instalouse no mundo do traballo co risco de converterse nun problema estrutural, a pesar de que a Xunta o siga negando coa intención de non asumir a reforma laboral e a represión contra os movementos sociais e a clase traballadora. A parlamentaria acusou ao PP de ser a España cañí e non plantar cara contra as decisións de Madrid que tan gravemente danan a clase traballadora, dixo.
Tras a intervención do portavoz do PP, Miguel Tellado quen asegurou que en Galiza se están a producir importantes baixadas no número de persoas desempregadas, a parlamentaria reiterou a defensa dunha lexislación laboral própria para Galiza e o seu pobo.
Día da Clase Obreira Galega
Prado lembrou que onte foi conmemorado o Día da Clase Obreira galega e explicou que no ano 72, en Ferrol estaban todos pero uns disparaban e outros morrían en resposta ao voceiro popular que minutos antes reprochou a oposición patrimonializar a celebración.
Esta iniciativa vai de clase obreira galega e vostedes, dixo, entenden clase obreira para explotala, son a España Cañí e no BNG non nos resignamos a que outros decidan por nós nin por intereses alleos. Nós aspiramos a un Goberno merecente de tal nome, que queira exercer como tal e que Galiza non sexa delegada de Madrid, que tome as súas decisións e esta iniciativa vai contra o centralismo e contra os que deciden por nós, recalcou.
Montse Prado lamentou o voto contrario do PP á iniciativa nacionalista que demandaba máis soberanía para o Goberno galego en materia laboral.
