A deputada defendeu unha moción contra a privatización do servizo de mantemento dos equipos electromédicos
Pleno.- A deputada do BNG, Montse Prado defendeu hoxe unha moción contra a privatización do mantemento integral de equipamentos electromédicos adxudicados polo SERGAS.
A parlamentaria denunciou a entrega dos servizos de electromedicina a unha única empresa privada e criticou que o Partido popular sega negando a privatización dos servizos sanitarios baixo o epígrafe regularizar e homoxeneizar, vostedes, manifestou, están vendendo a Sanidade pública galega por lotes en referencia aos servizos sanitarios xa privatizados ou pendentes de privatizar.
A deputada amosou a súa estupefacción ao escoitar ao portavoz popular, Aurelio Núñez Centeno afirmar que nos hospitais sen UCIs non é necesario un tempo de resposta ante unha posíbel avaría. Prado preguntou se isto tamén se podía afirmar dos centros onde son atendidos os partos, urxencias e intervencións cirúrxicas.
A parlamentaria criticou que o Partido popular sega negando sen o mínimo rubor a evidencia dunha privatización sistemática da Sanidade pública galega en beneficio de empresas privadas e de fora de Galiza. Empresas, que pertencen a fondos de capital risco en paraísos fiscais e multinacionais estranxeiras.
Ademais, engadiu, son empresas que foron saneadas con fundos públicos e vinculadas ao Partido popular como o servizo de Ambulancias A Levante, Telecomunicacións do SERGAS a Telefónica, Catering a Portovello, electromedicina a Iberman S.A de Zaragoza, non só privatizan senón que o fan con empresas de fora de Galiza, afirmou.
Vostedes, reiterou, utilizan o mantra da crise para privatizar e crear un novo nicho de mercado que entregan á empresa privada. Montse Prado asegurou que o servizo de mantemento de equipamento electromédico pode ser rescatado por incumprimento reiterado de contrato da empresa. A deputada tamén pedía poñer en marcha as medidas necesarias para que o SERGAS asuma con persoal propio, e de maneira pública, este servizo.
O Partido popular votou en contra da moción defendida pola parlamentaria do BNG.
