A deputada do BNG cualificou de desolador constatar que cada día cerran máis comercios nas vilas galegas
Montse Prado formulou unha pregunta ao Goberno sobre as previsión da Xunta ante a perda continuada de postos de traballo e caída de vendas no sector do pequeno comercio en Galiza.
Na súa intervención, a deputada amosou a súa indignación ante o diagnóstico realizado polo conselleiro de Industria sobre o sector do comercio galego e convidouno a trasladar persoalmente ao sector as súas afirmacións relativas a que o comercio galego está mellor que noutras partes do Estado.
A deputada lamentou a resposta do conselleiro e dixo que resulta desolador constatar como día a día se incrementan nos establecementos comerciais os carteis de alúgase, traspasase ou cerrase.
Para a deputada, tamén resulta desolador comprobar que o Goberno galego deixa morrer o noso comercio e mantén unha postura de desleixo ante un sector que padece moi negativamente as políticas do goberno galego e central. As consecuencias da falta de consumo son produto, dixo, dos 300.000 parados e paradas en Galiza e de miles de persoas que non cobran ningunha prestación e dos fogares nos que non entra nin un só euro.
A deputada sumou a esta situación, a eliminación das pagas extras e a redución de salarios, medidas dixo, aplicadas polo Partido popular e que están conducindo á ruína ao noso comercio.
Prado rexeitou as afirmacións do conselleiro de Industria relativas ás medidas para mellorar ao sector e advertiu que esas medidas non son eficaces por incidir na falta de crédito, vostedes, dixo, son os responsables da eliminación do sistema financeiro galego e en consonancia a supresión de liñas de finanzamento para o comercio.
A parlamentaria acusou a Conde de acatar as ordes que proveñen de Madrid e desertar da súa función e cualificou de fraude ao Goberno galego por non exercer as súas competencias nesta materia e contribuír á recentralización do Estado e baleirar de competencias a Galiza.
A nacionalista concluíu reprochando á Xunta asumir con entusiasmo medidas lesivas para Galiza e contra a revitalización do pequeno comercio galego.
