O candidato do BNG á presidencia da Xunta de Galiza, Francisco Jorquera, criticou que o goberno de Feijoo mantén oculto o contrato que asinou con PEMEX, malia que o BNG o solicitou no Parlamento de Galiza.
Non sabemos -advertiu- que quere ocultar Feijoo dun contrato que, en todo caso, non será unha solución para a grave crise que atravesa o sector naval galego e, en concreto, o da ría de Ferrol.
Unha delegación do BNG, liderada por Francisco Jorquera, reuniuse esta mañá con representantes das industrias auxiliares do naval da comarca de Ferrolterra e con delegados sindicais, que lle transmitiron a súa preocupación polo futuro de miles de postos de traballo na comarca.
O PP ten responsabilidades na crise do sector naval
O candidato do BNG á presidencia da Xunta lembrou que o sector naval é o sostén da comarca de Ferrol e o seu futuro depende deste sector.
Porén, subliñou que a situación crítica do naval ten responsábeis, porque o PP comprometeuse a facer un dique flotante se gañaba as eleccións e está a incumprir este compromiso.
O señor Feijoo di que ou dique flotante ou carga de traballo, pero son necesarias as dúas cousas, porque o dique flotante é necesario para que haxa carga de traballo, afirmou.
Os traballadores dinlle a Jorquera que a súa situación é critica e que vai empeorar nos próximos meses
Ademais, Jorquera criticou que o presidente da SEPI dixo que había que levantar o veto, pero resulta que o goberno español non iniciou o procedemento para que se levante o veto sobre os estaleiros da ría de Ferrol.
Polo tanto -concluíu-, hai responsábeis, e é fundamental que se asume que o naval é un sector estratéxico e que a Xunta e o goberno central actúen en consecuencia e deixen de darlle as costas a esta comarca.
Feijoo mantén oculto o contrato con PEMEX
A preguntas dos xornalistas sobre se o contrato anunciado pola Xunta con PEMEX para construír uns remolcadores será unha solución para a crise do naval, Jorquera advertiu de que o BNG solicitou no Parlamento Galego que a Xunta de Galiza remitise ese contrato con PEMEX, pero aínda non o fixo, e non sabemos que queren ocultar.
En calquera caso, subliñou que os remolcadores forman parte da construción naval civil, polo que os estaleiros da ría de Ferrol estarían afectados polo veto de Bruxelas, e non serían unha solución para os estaleiros da ría.
Pola contra, o candidato do BNG defendeu que a solución pasa por dotar ao estaleiros de Ferrol dun dique flotante e que ese dique se constrúa no estaleiro de Fene para asegurarlle carga de traballo, e pasa por superar as limitacións impostas por Bruxelas. Polo tanto -incidiu-, o goberno central o que ten que esixir é a apertura de negociacións coa Unión Europea para o levantamento do veto.
Situación crítica para os traballadores
Francisco Jorquera alertou de que a situación do sector en Ferrol para os traballadores empeza a ser dramática, tento en conta que está habendo moitos despidos colectivos e que non hai perspectivas a curto prazo de que os estaleiros principais teñan carga de traballo, polo que nos próximos meses vai empeorar a situación.
Feijoo e o PP teñen responsabilidades: incumpriron a súa promesa de construír o dique flotante e non negocian con Bruxelas o levantamento do veto
Por iso, salientou a importancia de que haxa un cambio de rumbo absoluto na actitude que están tendo o goberno Central e a Xunta de Galiza para evitar que eta comarca entre nunha crise irreversíbel.
O BNG apoiará a manifestación deste domingo en defensa do naval
Por último, o candidato do BNG á presidencia da Xunta anunciou que asistirá este domingo á manifestación en Ferrol en defensa do sector naval e en demanda de carga de traballo.
