A deputada defendeu unha Proposición non de Lei para modificar a lei que regula a abusiva taxa aos concellos por este servizo, iniciativa que o Partido popular rexeitou.
A deputada do BNG, Ana Pontón cualificou de moi feo mentir porque denigra a actividade política en alusión á intervención do portavoz do Partido popular, Daniel Varela que fixo referencia a existencia dun acordo coa FEGAMP para incrementar a taxa de SOGAMA.
Sobre esta cuestión, a nacionalista explicou que é falso que se producira algunha negociación ao respecto, máis ben todo o contrario, despois de exercer presión os alcaldes nacionalistas e tamén algúns socialistas fronte a suba abusiva da taxa, tivo lugar unha xuntanza onde o Goberno galego defendeu non cuestionar o modelo SOGAMA nin a suba que pretendían aplicar. Neste Parlamento, dixo, se o PP tivera vontade política, en vez de retrasar a suba a dous meses podían facelo a seis, porqué non o fixeron? preguntou.
Non intenten responsabilizar aos demais das decisións que adopta o Partido popular, recriminou a nacionalista a Varela. A intención do BNG, afirmou, é parar unha suba abusiva aos cidadáns e modificar un modelo que vai en contra da lei porque SOGAMA resulta unha bomba ambiental e económica e nós reclamamos un modelo de xestión de Residuos sólidos Urbanos diferente.
SOGAMA, non ofrece futuro nin estabilidade á xestión dos residuos no noso País, o BNG non apoia este modelo nin en Pontevedra nin noutro concello, dicimos non a SOGAMA e traballamos por outra alternativa, concluíu.
