O deputado do BNG no Congreso, Néstor Rego, xunto co deputado da comarca no Parlamento da Galiza, Ramón Fernández Alfonzo, a Responsábel Comarcal do BNG, Pilar Lozano, e o Voceiro Municipal en Ferrol, Iván Rivas, mantiveron unha reunión coa representación sindical da CIG do CAMF de Ferrol para analizar a actual situación do servizo, as instalacións e do persoal, así como trasladar as últimas iniciativas rexistradas nas Cortes. No concreto, o BNG sinala a necesidade de emprender unha reforma integral do CAMF e dotalo de persoal suficiente, cubrindo as baixas e forma estábel e con condicións dignas, así como dos medios e recursos necesarios, co obxectivo de acadar estándares de calidade e benestar adecuados e mellorar as condicións laborais.
O CAMF de Ferrol xa foi obxecto de diversas iniciativas na pasada e na presente lexislatura da man do BNG ao entender que estas instalacións presentan un estado de deterioro e de falta de mantemento importante, ademais de non cumprir cuns mínimos estándares de confortabilidade, benestar e humanización. Así mesmo, padecen dunha preocupante falta de persoal que dificulta a prestación dunha atención digna e provoca que os e as traballadoras do centro estean sumidas na precarización laboral e mesmo obrigadas á concatenación de contratos temporais.
Adaptar o centro para unha mellor prestación do servizo
“O BNG fai súa a demanda do propio persoal do centro e as usuarias e usuarios que levan moito tempo reclamando investimentos para a mellora do centro que precisa dunha rehabilitación e reformulación integral, abordando unha estratexia clara de mellora e modernización” afirma o deputado do BNG no Congreso. Unha reforma, continúa Rego, para acadar os estándares de calidade e benestar adecuados para as persoas con discapacidade física que residen neste centro.
Porén, as obras comprometidas desde o Ministerio son parciais e orientadas a corrixir algúns dos elementos avariados, mais moitas delas, a pesar da urxencia, aínda están en fase de adxudicación. Destaca a reparación dos ascensores -só funcionan dous dos seis dispoñíbeis- e a das dependencias de cociña -con fugas de auga-, que a pesar de ser imprescindíbeis aínda non foron acometidas. “Por este motivo urximos ao Ministerio a axilizar e iniciar as obras o antes posíbel pois son imprescindíbeis para unha atención adecuada ás persoas usuarias” expón o deputado nacionalista.
O Portavoz Municipal do BNG, Iván Rivas, destacou, pola súa parte, a importancia de manter un centro destas características na comarca de Ferrol para dar servizo á súa cidadanía. “O CAMF presta un servizo fundamental para a atención ás persoas con grande dependencia, é preciso asegurar que se mantén nunhas condicións dignas para prestar un servizo de calidade tan importante en Ferrol e na comarca”.
Maior persoal para evitar a precarización
Por outra parte, a organización nacionalista urxe cubrir todas as prazas vacantes e dotalas do persoal suficiente “co obxectivo de dar un servizo de calidade ás persoas dependentes, tanto as que viven en réxime de internado como ás de atención diúrna” declara o deputado galego Ramón Fernández. “Hai que destacar que, sumado ao problema da insuficiencia de persoal, no CAMF dáse unha situación de grande precarización laboral, con horarios e quendas inasumíbeis e a contratación a través de contratos temporais concatenados de menos de 15 días que, nalgúns casos, superan os mil, por circunstancias de produción”.
Novas iniciativas
O Deputado do BNG no Congreso, Néstor Rego, comprometeuse a rexistrar novas iniciativas para reclamar do Ministerio axilización das obras urxentes así como a execución da mellora integral necesaria das instalacións. Ademais, tamén presentará preguntas en relación ás condicións actuais do cadro de persoal, baixas, quendas, tipos de contratos e contratacións. Así mesmo, presentará iniciativas para coñecer o estado actual da lista de espera deste centro do que non se están a cubrir o total das prazas dispoñíbeis a pesar da alta demanda.
Tamén se analizou na reunión a posibilidade, anunciada por parte do Ministerio de Dereitos Sociais de iniciar as negociacións para a transferencia do CAMF de Ferrol e do centro de Bergondo á Xunta da Galiza, tema que preocupa especialmente ás traballadoras e traballadores, pola falta de información ao respecto, pero tamén ás persoas usuarias, por como pode afectar ao servizo e sobre o que anunciaron tamén iniciativas tanto a nivel das Cortes como do Parlamento Galego, por parte do Deputado Ramón F. Alfonzo.
