A deputada do BNG, Olalla Rodil, e a vicepresidenta da Deputación, Maite Ferreiro, mantiveron un encontro con nais e pais do alumnado de Portomarín que acoden a recibir aulas de Bacharelato ou Formación Profesional á cidade de Lugo, que neste momento estanse vendo afectadas polos cambios organizativos por mor da COVID-19.
Desde o Bloque Nacionalista Galego ,ao igual que as familias e estudantes afectados, esiximos que é unha obriga do Goberno galego garantir fórmulas de transporte que permitan acudir aos centros en condicións de equidade, acceder ao ensino a todo o alumnado independentemente do seu lugar de residencia.
Olalla Rodil declarou que ”este estudantado non conta cun transporte habilitado pola Xunta de Galiza, o que en circunstancias normais encarece o acceso a este nivel educativo, porén, aínda supón un maior custe se a única opción coa que contan é un taxi” ao que engadiu “esta é a consecuencia do recorte de servizos no medio rural que levamos vendo durante as últimas décadas”.
Neste sentido non é a única localidade afectada, “estudantes que viven noutros concellos como O Corgo, Nadela, Castroverde ou Guntín non teñen liñas de autobuses que fagan chegar puntuais as súas clases” resaltou Olalla Rodil.
Desde o bloque resaltan a necesidade de pór en marcha ferramentas de mobilidade desde as áreas rurais, o que fai “contar cun conxunto de servizos que non só as alumnas se benefician, senón que o conxunto da veciñanza tamén posúa ferramentas para a súa mobilidade polo territorio” sinalou Rodil.
