O BNG cualifica de inútil a proba da reválida imposta pola LOMCE, que en Galiza afecta a cerca de 22.000 alumnos e alumnas de entre 11 e 12 anos de idade.
Somete a unha tensión innecesaria ao alumnado e causa problemas na organización pedagóxica dos centros, cando os esforzos e os recursos dos que dispón o ensino público deben poñerse ao servizo dunha educación de calidade e do seguimento personalizado dos e das estudantes, en vez de perder o tempo con probas sen ningún sentido e que, ademais, están inspiradas nun modelo fracasado, nas leis e no modelo educativo do franquismo, denunciou a portavoz nacional, Ana Pontón.
A dirixente nacionalista participou na concentración de protesta organizada pola Plataforma Galega en Defensa do Ensino Público, da que forma parte o Bloque, ante a sede da Consellería de Educación, á que tamén asistiron integrantes da Executiva nacional como Rubén Cela, Noa Presas e Bieito Lobeira.
Pontón alegou que a maioría social rexeita a reválida, proba que xa no pasado curso tivo unha forte oposición de nais, pais e alumnado: Vimos como miles de persoas non enviaban aos seus fillos e fillas a facer esa proba. O Bloque, dixo a tamén deputada, apoia a eses pais e nais insubmisos que defenden un ensino de calidade para os seus fillos e fillas.
Unha vez máis, o BNG reclama a derogación da LOMCE e a supresión das reválidas e, nese sentido, lamenta a oportunidade perdida polas autodenominadas forzas do cambio, incapaces de aproveitar a minoría do PP para botar por terra a Lei Wert.
O 26X é, dixo, unha segunda oportunidade para que os galegos e as galegas volvamos ter voz propia no Congreso, porque Galiza precisa un marco educativo propio que non se limita a derogar a LOMCE, senón desenvolver e aplicar as competencias en materia de ensino e en materia educativa, concluíu.
