O BNG vai reclamar no Parlamento que se habiliten axudas directas aos Concellos e aos particulares afectados polas inundacións destes pasados días, especialmente importantes en concellos como Sada e Carballo, para paliar os prexuízos económicos no entorno público e nos bens privados nun momento de dificultade económica evidente onde dar unha resposta rápida permitirá a moitas familias manter as súas fontes de ingresos.
A portavoz nacional, Ana Pontón, avanzou esta proposta durante a súa visita ao concello de Carballo para coñecer directamente os efectos dos asolagamentos.
Neste sentido, avanzou que o Bloque vai presentar na Cámara galega unha batería de medidas. En primeiro lugar, sacar de inmediato unha orde de axudas para paliar os danos, -tanto os que afectan ás infraestruturas dos municipios como os causados a particulares-, en segundo lugar, que se habiliten partidas específicas por parte do Goberno central que tamén inclúa beneficios fiscais ás actividades de comercio ou empresarial afectadas.
En definitiva, explicaba Pontón, tanto a Xunta como o goberno central deben habilitar medidas de apoio directo e indirecto para compensar as pequenas e medianas empresas, ao comercio, é dicir, á actividade económica que ten moita importancia a nivel local e para a que debe haber unha resposta axeitada que non se está a producir neste momento.
Por último, o Bloque levará ao Parlamento medidas a adopción de medidas estruturais que eviten que se repitan situacións como as vividas estes días en diversos concellos do país. É evidente que hai un problema de inundacións, que hai unha realidade construída que condiciona, e a Xunta debería dar prioridade á limpeza de ríos e a execución das medidas pendentes para a prevención de asolagamentos, subliñou a tamén deputada.
Pontón evidencia que existiron prácticas urbanísticas que non tiveron en conta a realidade física do territorio, pero botamos de menos unha actuación máis decida por parte do executivo galego, que nesta materia ten moito traballo por facer, concluíu.
A portavoz nacional fixo un percorrido pola área de San Martiño acompañada polo grupo municipal, e puxo en valor a xestión da equipa de goberno que favoreceu a contención dos danos, grazas por exemplo a manter limpo o couce do río ao seu paso por Carballo, ou medidas previstas como a demolición dunha edificación que permitirá ganar espazo na zona de asolagamento.
As axudas estarían dirixidas a persoas físicas ou xurídicas nos concellos afectados para cubrir danos persoais e patrimoniais, de bens vinculados ás actividades económicas, establecementos comerciais, mercantís ou turísticos. No caso dos concellos, a idea é facilitar o finaciamento dos danos causados en infraestruturas e servizos públicos.
