No pleno do Parlamento Europeo, a eurodeputada do BNG, Ana Miranda, denunciou a precariedade laboral do persoal sanitario en Galiza así como o deterioro da sanidade pública. “Se queremos atención sanitaria de calidade os profesionais precisan o recoñecemento dos seus dereitos laborais e traballo digno”, salientou a eurodeputada galega na Eurocámara.
“No meu país, Galiza, a precariedade laboral no eido sanitario debido ao abuso de contratos temporais é o normal”, denunciou Ana Miranda na súa intervención no debate sobre a “Necesidade de abordar la acuciante escaseza de mano de obra e garantir postos de traballo de calidade no sector da asistencia sanitaria”. Criticou asemade que en Galiza “faltan traballadoras e traballadores na saúde, faltan investimentos públicos e faltan salarios dignos e acceso a tratamentos”.
Como exemplo da situación sanitaria, a eurodeputada galega puxo de manifesto a falta de persoal de enfermería en Galiza a respecto da media europea: “Se a media europea de enfermeiras é de 8,5, e a media do Estado español é de 6,3, a media na Galiza é de 5,1, a peor taxa de profesionais de enfermería da Unión Europea”, manifestou.
“É imprescindible que os profesionais da saúde teñan condicións de traballo dignas para garantir a calidade dos sistemas sanitarios e para garantir os coidados que lamentablemente a dereita e a extrema dereita se empeñan en desmantelar e privatizar, como fai o goberno do PP na miña terra”, manifestou a eurodeputada do BNG, quen desde o seu escano saudou á plataforma Sos Sanidade Pública.
