O parlamentario mostrase orgulloso de ter contribuído a impedir o desafiuzamento da octoxenaria Aurelia Rey e cualifica de impresentable enteirarse da sanción por un xornal
O portavoz do grupo parlamentario do BNG, Francisco Jorquera manifestou hoxe a súa perplexidade ante a información publicada nun medio de comunicación que anuncia o inicio do expediente de sanción da Subdelegación do Goberno contra el e o voceiro do BNG, Xosé Manuel Carril, por ter participado o día 18 de febreiro no desafiuzamento dunha veciña de 85 anos na cidade de A Coruña.
O nacionalista, que compareceu en rolda de prensa, tras a Xunta de portavoces, afirmou sentirse moi orgulloso de contribuír a impedir que unha anciá ficase na rúa e considerou que de ser certa a información publicada, as autoridades gubernativas están faltando aos procedementos reglados en calquera estado de dereito.
O parlamentario sancionado non recibiu ningunha comunicación
Jorquera asegurou non ter recibido, a día de hoxe, ningunha comunicación e non coñecer a ningún José Manuel Carril porque o voceiro do BNG no Concello de A Coruña, dixo, chámase Xosé Manuel Carril en Galiza e na conchinchina.
Para o deputado, as aoutoridades non están respectando a legalidade lingüística imperante en Galiza e criticou a propia terminoloxía na información publicada da que dixo, retrotráeme a outros tempos ao falar de cabecillas, tempos do franquismo.
Autoinculpación como acción colectiva e solidaria
Outro dos aspectos que salientou é o referido ao inicio de dilixencias xudiciais nos actos para evitar o desafiuzamento de Aurelia Rey, e para que estas non prosperaran, explicou, as persoas que alí estabamos decidimos autoinculparnos nunha acción colectiva e de solidariedade contra un acto inxusto que pretendía deixar a unha anciá na rúa e en total indefensión.
Jorquera mostrou a súa sorpresa ante a desestimación da autoinculpación para dar paso a un expediente ao fin de sancionarnos, a min e a outras persoas pola vía administrativa impedindo a posibilidade de acudir a un tribunal para ratificar a miña actuación.
Asuntos a debater na vindeira sesión plenaria
Na comparecencia tras a Xunta de Portavoces, Jorquera deu conta dos asuntos que serán debatidos na vindeira sesión plenaria entre os que destacou diversas proposicións non de lei do BNG sobre a situación do sector naval, o futuro da empresa Pescanova e a retirada do Plan sectorial co fin de impedir as previsións do Goberno galego en proxectos mineiros como o de Corcoesto.
Asemade, o BNG defenderá unha moción contra o desmantelamento do ferrocarril e unha Proposición non de lei, xunto ao PSdeG e AGE, para acadar un pronunciamento do Parlamento galego fronte ao ataque dos dereitos das mulleres á saúde sexual e interrupción do embarazo.
O grupo nacionalista tamén presenta unha proposta de lei para establecer un imposto ás grandes superficies comerciais en defensa do pequeno comercio e como medida coercitiva para limitar a profusión das mesmas en Galiza.
Cautela para valorar as cifras do paro
A preguntas dos xornalistas sobre os datos do desemprego, o deputado afirmou que deben ser tomados con cautela xa que no Estado existen case cinco millóns de persoas sen emprego e en Galiza a taxa sitúase preto dos 300.000, a enquisa de poboación activa, dixo, reflicte datos de desemprego maiores.
Para Jorquera é necesario avaliar o impacto estacional na redución de desempregad@s e ter en conta que en Galiza, o número de xubilados e persoas sen emprego supera o número de ocupad@s polo que hai que valorar con enorme prudencia os datos publicados hoxe, concluíu.
Escoita o corte de audio coas declaracións de Jorquera
