O portavoz do Grupo parlamentario do BNG volveu reclamar hoxe do Presidente da Xunta medidas contra os cargos do Partido popular imputados en casos de corrupción
A través da pregunta ao Presidente da Xunta, Francisco Jorquera acusou ao Presidente da Xunta de aplicar o vello dito xornalístico que a realidade non estrague un bo titular ante a súa negativa a explicar con responsabilidade política os casos de corrupción.
Neste sentido, o deputado lembrou que foi o propio Presidente da Xunta quen manifestou na Cámara galega a súa intención de perseguir todas aquelas accións dos cargos do Partido popular que usen a política para lucrarse.
Para o nacionalista, a actitude de Feijoo redúcese a preservar a súa imaxe como posible sucesor de Mariano Rajoy, e por iso négase a perseguir a corrupción.
Casos de corrupción en Galiza dos que Feijóo non quere falar
Ante a multitude de casos que salpican ao Partido popular, tamén en Galiza, Jorquera afirmou que na sociedade hai alarma e indignación e o Presidente da Xunta segue botando balóns fora e facendo que non se entera como xa fixo na pasada sesión de control.
Trala resposta do Presidente da Xunta negando que exista corrupción no Partido popular e cargos implicados, Francisco Jorquera enumerou entre outros a: José Luís Baltar imputado por presunta prevaricación continuada, o delegado da Xunta en Ourense candeado por defraudar fondos públicos, os alcaldes populares de Santiago, O Carballiño, Baltar, Fisterra, Mazaricos, Barreiros, Muras, O Pino, Abegondo imputados por presuntos delitos relacionados coa corrupción, o alcalde de Barbadás investigado pola Axencia Tributaria despois de admitir un pequeno desequilibrio de ingresos por máis de 200.000 euros, o alcalde de Portas por delito fiscal. A pesar de todo isto, dixo vostede sempre mira para outro lado, parole, parole, parole.
Feijóo só comparece na Cámara por obrigación
O voceiro do G.p do BNG criticou que Núñez Feijoo non compareza na Cámara galega, agás de maneira regrada, e explique con claridade que quere dicir cando manifesta que casos como o de Bárcenas, prodúcenlle repugnancia.
Jorquera explicou que a Audiencia nacional acaba de vincular a o ex-tesoreiro do Partido popular coa trama Gürtel e nesta relación a peza central é o Partido popular de Galiza por presunta financiación ilegal dos actos de campaña entre 1997 e 1999 entregando 21 de millóns de euros a Sede do PP en Génova, algo terá que dicir R.Feijóo, inquiriu.
O deputado preguntou qué medidas reais vai adoptar o Presidente da Xunta para perseguir a calquera cargo do Partido popular que use a política para lucrase.
Ante as explicacións de Núñez Feijoo negando a súa responsabilidade nas cuestións referidas polo parlamentario do BNG, Jorquera considerou que en calidade de Presidente do Partido popular en Galiza debe aclarar a contabilidade , mesmo dun período anterior, non eluda a súa responsabilidade, dixo o deputado.
Jorquera concluíu a súa intervención afirmando que o Presidente da Xunta caracterizase por non dicir nunca unha mala palabra nin facer unha boa acción, parole, parole, parole...
