O candidato do BNG á presidencia da Xunta, Francisco Jorquera, asegurou esta tarde noite nun mitin que o cambio real que precisa Galiza é posíbel se todos e todas imos votar, se non dividimos o voto.
Jorquera amosouse convencido de que de se concentrar todo o voto nacionalista, galeguista e de esquerdas no BNG, Feijóo perderá as eleccións e de aí a estratexia do PP de que se disperse voto, fagamos, pois, o que máis lle doe ao PP e votemos BNG.
O candidato nacionalista defendeu o voto para o BNG porque nós temos proxecto de País, nós cremos en Galiza e nas súas potencialidades a diferenza de Feijóo, que está máis preocupado por facer carreira en Madrid, malia que agora tente agachar as súas siglas e as fotos con Mariano Rajoy, como volveu acontecer hoxe.
Segunda oportunidade
Para Jorquera, un presidente da Xunta que renega das súas propias siglas é un presidente indigno e un presidente que minte non merece unha segunda oportunidade, esa oportunidade ten que ir -dixo- para unha formación como o BNG, que priorizará as políticas sociais e unha reforma fiscal que faga pagar máis a quen máis ten como estratexia contra a crise.
O BNG ten proxecto de País mentres Feijóo volve evitar a foto con Rajoy cando o seu programa é de sumisión total a Madrid
Neste sentido, apostou pola necesidade de ter máis autogoberno porque a saída social que precisa a crise pasa tamén por ter máis soberanía, por poder decidir dende Galiza sobre a pesca, sobre a enerxía, sobre o prezo do leite ou sobre o naval.
O balanzo de Feijóo durante esta lexislatura é a do pior goberno da historia de Galiza, é a dun frío contábel en vez da dun presidente da Xunta, que deixa 113.000 persoas máis nas listas do paro, 60.000 mozos e mozas na emigración, máis de 3.000 gandeiros que tiveron que pechar as súas explotacións e máis de 5.000 pequenas e medianas empresas liquidadas.
O candidato do BNG engadiu a esta desastrosa realidade as trampas de Feijóo á hora de cadrar as contas e incidiu no informe do Consello de Contas que demostra a desviación de 400 millóns de euros do exercicio 2010 a 2011.
Jorquera concluiu apelando ao espíritu de Nunca Máis, toda vez que nuns días comeza o xuízo do Prestige, para que o 21 de Outubro o pobo galego diga non á marea negra do centralismo, da perversión da democracia e da inxustiza social. Feijóo sabe que se concetramos o voto e dicimos non o PP ten as eleccións perdidas.
Carlos Aymerich
Pola súa parte, o cabeza de lista por Pontevedra, Carlos Aymerich, animou ás 400 persoas que se congregaron no Pavillón Alvaro Pino a que non se deixen enganar outra vez polas mentiras de Feijó, "son virtuosos da mentira, insultan a nosa intelixencia", dixo.
Aymerich preguntou aos asistentes se acaso Ponteareas, que é un bo exemplo de sucesivos gobernos do PP, ten unhas contas "tan saneadas", ironizou, e cuestionou, se tanto se aforra onde mete os cartos Feijóo, "pois a sanidade ou ensino non van".
http://youtu.be/Fz60jJ82gxs
