Hai alternativas, subliña Xavier Vence na presentación da campaña Non é unha crise. É un roubo
Banca pública, defensa da economía produtiva e novos acordos comerciais son algunhas das medidas apuntadas
O portavoz nacional do BNG, Xavier Vence, presentou este sábado a campaña Non é unha crise. É un roubo, coa que a forza de nacionalista quere denunciar a situación económica grave, case desesperada actual e impulsar unha resposta social unitaria. Nunha rolda conxunta co secretario de Organización Bieito Lobeira e a secretaria de Imaxe, Montse Prado, o portavoz nacional subliñou que o BNG propón alternativas claras fronte ás políticas do PP na Xunta e no goberno do Estado.
Temos que xuntar a loita dos aforradores estafados polas preferentes e subordinadas, coa loitas dos desafiuzados e coa loita de todos os traballadores, contribuíntes e autónomos e empresas produtivas para poñer á banca no seu sitio, para que paguen os verdadeiros culpábeis desta situación, subliñou Xavier Vence.
Para o portavoz nacional, urxe tumbar a un PP que lexisla só en beneficio desa banca e cómpre impulsar políticas que permitan poñer os recursos do país a funcionar, crear emprego e riqueza.
Precisamente co obxectivo de forzar ao PP a mudar completamente o rumbo da política económica ou convocar novas eleccións, Vence fixo un chamamento a todas as forzas políticas nacionalistas e des esquerdas, ás forzas sindicais, e aos movementos sociais dos diferentes colectivos afectados, para establecer unha estratexia común que permita cambiar o rumbo social e económico.
A cidadanía debe rebelarse antes de que sexa demasiado tarde, sinalou o portavoz nacional. Cómpre unha rebelión organizada de todos e todas os que non nos resignamos a perder todos os dereitos e conquistas, defendeu.
Dignose da situación
Segundo asegurou Xavier Vence, as políticas de redución do déficit só levan a máis déficit e ao aumento da débeda, ademais de estrangular a recuperación e o emprego. Sinalou ademais que esas medidas só teñen como obxectivo salvar á grande banca especulativa a costa de arrasar coa economía produtiva, os servizos públicos e os nosos aforros.
Como consecuencia desas políticas prexudiciais, apuntou que arredor de 64.000 familias están a piques de perder uns 600-700 millóns de euros coas quitas de preferentes e subordinadas, que van beneficiar finalmente a gran banca. No tocante a Galiza, sinalou que perde nese lance un volume de aforro que equivale ao 1% do noso PIB total, só co fin de salvar a elite enriquecida e poderosa que empobrece ás familias e espolia ao país enteiro.
Neste sentido explicou que unha grande parte da suba de impostos (IVE, IRPF, taxas, etc ) van destinados a pagar ao longo dos vindeiros anos o rescate da banca española (cando menos uns 180.000 millóns de euros da débeda pública -un 18% do PIB español-, que en 2012 fixo pasar o déficit público dun 7% a un 10,5% do PIB).
Os galegos e galegas imos pagar todo iso e ao final imos quedar sen aforros e sen sistema financeiro que alimente o crédito e o investimento no país, denunciou Xavier Vence. Ao seu xuízo, o aforro dos galegos e galegas seguirá emigrando a través do circuíto bancario da gran banca española que controlará as nosas entidades, e por non ter entidades propias que canalicen o aforro para o crédito dentro de Galiza, padecemos un curtocircuito financeiro que asfixia as nosas empresas da economía produtiva, desde as agrarias ao comercio.
Mudar as políticas
Co obxectivo de darlle a volta a esta situación, o portavoz nacional do Bloque subliñou que son precisas medidas de reactivación da economía produtiva para obter maiores ingresos e actuar sobre o déficit. Así, na súa intervención fixo referencia a diversas medidas que propón o Bloque nesta liña, como son a defensa da banca pública, fronte ao rescate da banca especulativa, ou a defensa da economía produtiva fronte á entrega dos recursos do país ás finanzas.
Para recuperar o emprego e o dinamismo económico precisamos mudar de raíz moitas políticas. En particular, precisamos unha Banca Pública Galega que xestione con ética e confianza o aforro dos galegos e que o canalice cara o investimento en agricultura, industria, servizos e innovación dentro do noso país, destacou.
Asemade, Xavier Vence destacou a necesidade de defender novos acordos comerciais, fronte á resignación ante a liberalización comercial; así como unha fiscalidade progresiva e a eliminación dos paraísos fiscais, fronte á evasión e a fraude fiscal das grandes fortunas; e reforzamento dos servizos públicos fronte á austeridade e os recortes no gasto social.
O portavoz nacionalista tamén fixo referencia as políticas da Unión Europea. Fronte a unha UE cada vez máis desigual, defendemos un novo modelo de Unión que garanta a viabilidade produtiva da periferia, e fronte a un BCE ao servizo da banca privada, queremos un BCE que financie aos estados, salientou.
