Demanda que comparezan Ordóñez, Currás e Almunia e insta a Goberno central a paralizar a venda de Novagalicia Banco
O portavoz do grupo parlamentario do BNG, Francisco Jorquera e a deputada Carme Adán afirmaron hoxe que non dan por pechada a comisión de investigación das caixas galegas e reclaman as comparecencias de Miguel Angel Fernández Ordóñez, Marta Fernández Currás e Joaquín Almunia.
Os deputados tamén consideran que debe comparecer en comisión José Luís Méndez Pascual, fillo do ex-director de Caixa Galicia, dado o seu relevante papel na entidade financeira.
Asemade, o BNG reclama novas comparecencias de José Luís Méndez e Julio Fernández Gayoso para explicar as indemnizacións millonarias a exdirectivos das caixas galegas e a emisión de participacións preferentes.
Carme Adán anunciou ante os medios de comunicación que o BNG, non formulará ningún cuestionario escrito ás persoas que se negaron a comparecer polo que pedirá o amparo á mesa da comisión das caixas e consultará cos servizos xurídicos da Cámara galega sobre a obriga de comparecer dos convocados.
Feijóo ofrece un espectáculo bochornoso na Comisión que investiga as Caixas galegas
Para o portavoz do BNG no Parlamento galego, Francisco Jorquera, unha vez máis, o Presidente da Xunta ofrece un espectáculo ante Galiza eludindo ás súas responsabilidades sobre o acontecido coas entidades financeiras galegas.
Núñez Feijóo, dixo, non respondeu a ningunha das preguntas formuladas e dedicouse a botar balóns fora como acostuma a facer cando é interpelado polos problemas dos sectores produtivos galegos.
O BNG insta ao Goberno central a paralizar a venda de Novagalicia Banco
Ante o anuncio da venda da entidade financeira fusionada, Jorquera manifestou que producirá un efecto catastrófico para Galiza e criticou que mentres Bankia non será vendida por considerala sistémica para España, Novagalicia Banco será posta a venda a prezo de saldo.
O deputado explicou que hoxe, máis que nunca, Galiza precisa dun sistema financeiro propio que impida o espolio do aforro galego e rexeitou que tras ser mobilizados máis de 9.000 millóns de recursos públicos para sanear a entidade financeira, agora sexa vendida a prezo de saldo.
Ata o 2017 hai tempo para escoller outras opcións, afirmou, e non aceptamos dicir Amén aos ditados de Europa nin a lóxica perversa de insuflar fondos públicos para sanear os bancos para seren mal vendidos despois.
Neste sentido, engadiu que o BNG presentou no Congreso unha Proposición non de lei destinada a paralizar o proceso de venda de NGB anunciado polo FROB.
Solución á estafa das participacións preferentes
Finalmente, o parlamentario apelou ao Goberno central para poñer fin a escalada de multas que están a recibir as persoas estafadas polas participacións preferentes por parte das autoridades gobernativas e reclamou abrir a arbitraxe para solucionar de maneira global a devolución dos cartos estafados.
