A través do proceso #Ideasparanosdefender invítase a deixar iniciativas ou opinións que se poden ser valoradas polos lectores
A web ofrece información sobre o traballo da candidata Ana Miranda e estará en permanente actualización
Durante a precampaña e campaña farase un uso intensivo das redes sociais, as máis seguidas entre as organizacións galegas
O BNG ven de lanzar a web BNG-Europeas 2014 (bng.com/europeas2014/) coa pretensión de que se converta nun espazo de información en continua actualización e, sobre todo, un espazo aberto á participación directa da cidadanía co obxectivo de recoller as súas propostas e valoracións ata o momento de celebración dos comicios.
Un dos aspectos máis relevantes da web, en liña coa candidatura da cidadanía que encabeza Ana Miranda, é o proceso #ideasparanosdefender, ao que se pode acceder no apartado bng.com/europeas2014/ideasparanosdefender/, no que se convida á participación de todos os galegos e galegas para aportar propostas, iniciativas ou medidas para ser incorporadas ao programa electoral do Bloque. Con este convite a participación social, o BNG complementa a rolda de contactos cos sectores produtivos, co mesmo obxectivo de recadar as súas propostas para incorporar ao programa antes da súa aprobación definitiva no Consello Nacional do 5 de abril.
Pensións contributivas para as amas de casa, supresión das axudas europea aos espectáculos taurinos e medidas para mellorar a eficiencia enerxética e promover o uso de enerxías renovables, participación directa de Galiza nas negociacións en Bruxelas de temas que lle afecten, defensa da lingua na Eurocámara, son algunhas das achegas feitas xa a través da opción #ideasparanosdefender, apenas horas despois da publicación da web. Ademais da formulación de ideas e propostas, pódese votar cada unha delas como forma de expresión de adhesión ou preferencia.
Igualmente, BNG-Europeas 2014 ofrece un resumo do traballo realizado pola candidata Ana Miranda como eurodeputada nesta Lexislatura, cuxo escano coincidiu coa negociación e aprobación das principais política comunitarias, como a Política Agraria Común (PAC), a Política Pesqueira Común (PPC), a Rede Transeuropea de Transportes ou o novo marco financeiro cos fondos europeos, que marcan, en todos os casos, as regras de xogo para o período 2014-2020.
Tamén se facilita información sobre a candidatura, o Manifesto Os Pobos Deciden e, as liñas básicas da alternativa do BNG ás europeas mentres se ultima o programa electoral co que a formación nacionalista concorre aos comicios do 25 de Maio. E, sobre todo, a web electoral pretende ser un canal de comunicación directa coa cidadanía, para recoller as súas propostas, as súas opinións e mesmos a súa indignación ante un modelo de Europa marcado pola Troika e pola dereita política, que ten aumentado as desigualdades e empobrecido á maioría dos galegos e galegas.
Uso intensivo de redes sociais, a máis seguida entre as organizacións galegas
Ademais do espazo web Europeas 2014, o BNG fará un uso intensivo das canles nas redes sociais para difundir o traballo realizado durante a anterior lexislatura, a súa posición no debate sobre o futuro da UE e mais o seu compromiso de defensa dos sectores produtivos galegos e dos colectivos sociais agredidos pola política económica e social ditada polo Estado e a Comisión. Durante a precampaña e campaña difundiranse materiais creados especificamente para estas canles, así como información da actividade da candidata Ana Miranda e do resto de membros da lista do BNG.
O BNG é a organización política galega que conta con máis seareiros e seareiras nas redes sociais. No día de onte a conta de Twitter @obloque, superou os 10.000 seguidores. A páxina oficial de Facebook da organización (www.facebook.com/bloquenacionalistagalego) tamén é a máis seguida entra as organizacións políticas galegas, con case 7.000 seguidores/as. A estes recursos súmanse os espazos das organizacións comarcais e locais, xunto coas contas persoais dos/as representantes públicos da organización. O BNG considera estas canles como unha vía fundamental de contacto e información coas persoas que se mobilizan en defensa do país e da súa xente, cos homes e mulleres que o BNG quere convencer da utilidade da súa proposta e candidatura para as eleccións europeas.
