O portavoz nacional do BNG, Guillerme Vázquez, e as deputadas nas Cortes do Estado Olaia Fernández Davila e Rosana Pérez presentaron hoxe en rolda de prensa a emenda do BNG á totalidade aos orzamentos do estado 2013 e as emendas parciais que rexistrará o Bloque.
O portavoz nacional afirmou que todos e todas pagaremos as consecuencias desas decisións erradas de Rajoy e do PP que, tal e como explicou, seguen a liña negativa xa iniciada e destinada a saquear o pobo para seguir cebando a banca.
Están a perpetrar unha transfusión xigantesca do sangue do pobo para alimentar a unha minoría, asegurou Guillerme.
Asemade, o portavoz nacional coincidiu coas deputadas nacionalistas en que estes orzamentos tamén os vai pagar Galiza vía diminución do financiamento. Do señor Feijóo non imos esperar que se opoña a estes orzamentos, conluíu, e en Galiza ímolo pagar claramente.
Cargan nas persoas en dificultades
A deputada Olaia Fernández Davila incidiu na súa intervención no feito de que estas cifras van incidir de forma moi negativa nas persoas en dificultades, e no benestar das persoas porque son nefastos para os servizos públicos: educación, benestar, servizos sociais e nefastos para os sectores que poden reactivar a economía.
Estamos ante uns orzamentos destinados unha vez máis a incrementar a recesión e incrementar o paro, aseverou Fernández Davila, ao tempo que aclarou que estas contas obrigan ás Comunidades Autónomas a incrementar as súas previsións de défice público nun 50% e subliñou que isto significa que van ter que ser as Comunidades Autónomas as que fagan os recortes sociais e en Galiza vai haber que facer recortes en sanidade, educación, etc.
Os departamentos de Educación e Cultura reducen os seus orzamentos nun 17%, Sanidade un 22% eliminando transferencias de cartos para a lei de dependencia ás comunidades autónomas, mentres outros departamentos como Interior só reduce o seu orzamento nun 6%, e Presidencia incremántao, denunciou Olaia.
Emendas parciais
A nova deputada do BNG no Congreso dos Deputados, Rosana Pérez, presentou as emendas parciais que rexistrará o BNG e que, tal e como explicou centraranse en cuestións diversas como pór enriba da mesa que hai que mellorar os orzamentos en sanidade, educación, na dotación da lei de dependencia e tamén en cuestións que afectan directamente ao noso país como onde están os cartos para incrementar os investimentos en investigación e desenvolvemento e os investimentos produtivos.
Rosana Pérez explicou que o BNG tamén ten cifrado de onde se poden detraer esas partidas necesarias para cubrir as demandas do BNG: eliminación das Deputacións, redución dos gastos de defensa, loita contra a fraude fiscal, unha reforma fiscal xusta e progresiva, diminución dos gastos da Casa Real ou facer pagar á Igrexa os impostos dos que aínda se libra.
http://youtu.be/MSlBLhlPe9E
