O BNG volve denunciar a criminalización das protestas das persoas estafadas pola banca que fai que sexan precisamente ás vítimas do roubo das preferentes e subordinadas as que teñan que dar explicacións ante os tribunais acusados pola Administración central, -a través das delegacións e subdelacións do goberno-, dunha suposta alteración da orde pública.
Para o Bloque, por contra, a loita dos e das preferentistas foi un exemplo de civismo e de valentía para reclamar o que se lles roubara ante a inacción, cando non cooperación, dos executivos central e autonómico do PP, como manifestou o portavoz nacional, Xavier Vence, que hoxe acudiu xunto co secretario de Organización, Bieito Lobeira, a declarar no xuízo de faltas celebrado contra Xulio Vicente, referente da loita social dos estafados dentro da Plataforma de afectados do Baixo Miño.
É evidente que houbo unha estratexia de criminalizar a protesta dos e das estafadas polas preferentes e subordinadas por parte do Goberno, denunciou Vence ás portas do xulgado do Contencioso Administrativo de Pontevedra, cando se trataba de mobilizacións cívicas e valentes de quen só pretendía facer valer os seus dereitos fronte ao roubo da banca e a posterior connivencia do Goberno.
O xuízo a Xulio Vicente, por participar nunha protesta ante unha sucursal da desaparecida Novagalicia Banco, eleva a medio centenar a cifra de vistas contra persoas que participaron na loita contra a estafa bancaria. Segundo explicou o propio Vicente, ata agora toda as sancións impostas, -que sumaban 20.000 euros de multa-, foron desestimadas tras aceptarse os recursos interpostos. Unha proba máis da criminalización premeditada da protesta para disuadir ás persoas estafadas de seguir loitando polos seus dereitos, concluíu Vence.
