A deputada do BNG, Carme Adán denunciou a falta interese do Goberno para abordar un deseño de usos sociosanitarios no edificio situado no centro da cidade de Vigo e os problemas derivados do seu peche nos comercios cercanos.
A parlamentaria do BNG, Carme Adán defendeu, a través dunha proposición non de lei, utilizar a torre do antigo hospital de Vigo para usos sociosanitarios.
A parlamentaria que comezou a súa intervención tras a resposta de Feijóo ás preguntas relacionadas coa denuncia contra Baltar, manifestou que tiña claro que o Presidente da Deputación de Ourense debe dimitir pero tamén, debe presentar a súa dimisión o Presidente da Xunta despois de acusar a oposición de frivolidade por traer a Cámara galega preguntas relacionadas coa violencia de xénero.
Xa no debate da iniciativa, Adán acusou ao PP de improvisación no traslado ao novo hospital Álvaro Cunqueiro e de non dedicar un só minuto ao futuro do antigo hospital e a respecto dos comerciantes da zona, dixo, nada de nada nin sequera unha proposta ou plan alternativo, pechan e punto a vostedes dálles igual.
A parlamentaria pediu ao Partido popular e o Goberno galego que non responda con evasivas e atenda as demandas do BNG sobre o antigo Pirulí de Vigo. A xente está preocupada por este edificio porque vemos que dentro dun ano seguiremos ensinando fotos do seu deterioro e dentro de dous pensarán en derrubalo, e dentro de cinco teremos as fotos do que foi o antigo hospital de Vigo porque o Partido popular non quixo montar o centro de alta resolución e manter unha área sociosanitaria non centro da cidade de Vigo.
Pola súa parte, o portavoz do Partido popular, Miguel Santalices respondeu á deputada do BNG que era o momento de reflexionar sobre o futuro do vello hospital de Vigo ao que a deputada respondeu que é necesario sempre reflexionar pero tamén dar pasos adiante na procura de utilizar os edificios, que en Vigo hai uns cantos sen uso e cun grave deterioro.
