A deputada do BNG no Parlamento Galego, Carme Aira, trasladou o seu apoio ás traballadoras do sector da limpeza na súa reivindicación dun convenio digno. Aira, acompañada das concelleiras do BNG Cristina López e Maite Ferreiro, acudiu ata a caravana dende a que o sector continúa a protestar.
A parlamentaria mantivo unha xuntanza con representantes do sector, onde coñeceu de primeira man o estado das negociacións e as reclamacións das traballadoras. A deputada afirmou que "é inadmisible que a Xunta de Galiza se poña de perfil nun conflito como o do sector da limpeza".
O sector da limpeza está a reclamar, ademais da mellora salarial, unha serie de melloras sociais e laborais como a actualización de salario base que agora esta por baixo do salario mínimo interprofesional e que os trienios non sexan un complemento fixo. Estamos a falar dun sector fortemente feminizado xa que o 95% do seu persoal son mulleres e onde existe un alto nivel de precariedade. "A Xunta non pode permitir que a proposta que esta encima da mesa, por parte da patronal, sexa de salarios por debaixo do salario mínimo interprofesional, nun sector xa moi precarizado e amplamente feminizado", declarou Carme Aira.
"A patronal ten que responder á mobilización masiva das traballadoras que levan en folga dende o 16 de outubro ", explicou a deputada do BNG, que se comprometeu a darlles voz no Parlamento Galego, pois a Xunta de Galiza, non pode ser indiferente perante ningún conflito, e por iso “dende o BNG sempre defendemos unha contratación pública na que se garantan unhas condicións sociais e laborais dignas nuns pregos de licitacións millonarios que as empresas usan para precarizar cada vez este sector" concluíu Carme Aira.
