A deputada e portavoz de pesca do BNG, Rosana Pérez reclama aos gobernos español e galego poñer á disposición das autoridades portuguesas todos os medios necesarios de salvamento e anticontaminación ante o incendio do petroleiro Greta K, producido fronte a costa de Porto.
A deputada sinala que as informacións e imaxes do buque petroleiro Greta K, situado a unhas 10 millas da costa portuguesa, están a causar “unha grande preocupación en Galiza e, sobre todo , no sector pesqueiro”.
Dende o incendio do petroleiro, no día de onte, “vemos con temor o empeoramento das condicións climatolóxicas e os infrutuosos intentos das autoridades portuguesas por apagar as chamas e poder atracalo no porto de Leixões”. A traxectoria do buque nas últimas horas e a súa proximidade ás nosas costas, sitúannos inevitabelmente naquel fatídico novembro de 2002 no que se produciu o afundimento do Prestige , “con gravísimas consecuencias para Galiza que se estenderon tamén a Portugal e a outros puntos das augas atlánticas e cantábricas”.
A nacionalista retería que, ante o risco dun novo sinistro na costa galega pola posible vertedura de combustible, os gobernos español e galego deben realizar un seguimento estrito da evolución do incendio do petroleiro Greta K e poñer á disposición das autoridades portuguesas todos os seus medios de salvamento e anticontaminación para “evitar un desenlace non desexado por ninguén”.
Ademais, a deputada do BNG tamén demanda toda a información sobre as medidas adoptadas para impedir un novo sinistro marítimo nas costas galegas.
