A viceportavoz nacionalista, Olalla Rodil avanzou que o BNG centrará a vindeira sesión plenaria en igualdade e medidas contra a discriminación.
Tras a Xunta de portavoces, Rodil compareceu ante os medios de comunicación e anunciou que o BNG defenderá entre outras propostas: crear unha “Valedoría da Igualdade” como organismo público encargado de velar polo cumprimento da lei de non discriminación entre mulleres e homes e con capacidade sancionadora ás empresas que cometan accións de discriminación salarial ou profesional por razón de xénero.
Asemade, o BNG reclamará a “transferencia” das competencias plenas en materia de inspección laboral con financiamento suficiente para un plan específico de inspección en materia de discriminación e “cláusulas de igualdade” na contratación pública galega que garantan a non discriminación pero tamén o avance da igualdade de xénero e da corresponsabilidade social.
Ademais, na sesión de control, a da portavoz nacional do BNG, Ana Pontón preguntará ao presidente da Xunta sobre as medidas que está a desenvolver o goberno galego para conseguir a igualdade real entre mulleres e homes nun momento como o actual no que a “crise económica, derivada da pandemia, está a golpear enormemente as traballadoras e supón unha profunda involución ao reforzar roles de xénero patriarcais e machistas”.
Na orde do día, o BNG incluíu unha Proposición non de lei sobre o impacto emocional e psicolóxico da pandemia. Dende o BNG, adiantou a nacionalista, propoñemos “trazar unha estratexia para enfrontar as consecuencias que esta crise sen precedentes ten na saúde mental da poboación”.
Finalmente Rodil aludiu á proposición non de lei do BNG para instar á Xunta de Galiza e o Estado español a presentar un recurso á sentenza da Audiencia Provincial sobre o Pazo de Meirás. “O pobo galego non pode pagar dúas veces por un ben espoliado roubado pola ditadura”, concluíu.
