A eurodeputada do BNG, Ana Miranda, subliñou o seu compromiso eliminación de obstáculos legais e administrativos entre Galiza e o norte de Portugal no desenvolvemento do seu traballo no Parlamento Europeo como eurodeputada galega. Manifestouno así no transcurso da conferencia que tivo lugar hoxe en Tui baixo o título “BridgeEU: Pontes e non barreiras nas fronteiras” e que contou cunha nutrida de representación das localidades dos dous lados da fronteira.
“Instamos ao goberno galego e ao estatal que Galiza conte con postos de cooperación transfronteiriza, que ten por obxectivo resolver os obstáculos administrativos que existen nas fronteiras”, salientou Miranda durante a súa intervención na conferencia, na que detallou a evolución da proposta de regulación europea para a eliminación de obstáculos legais e administrativos na cooperación transfronteiriza.
Explicou que a proposta presentada pola Comisión Europea en 2018 permaneceu paralizada até 2022 “e neste momento, curiosamente, a presidencia húngara quere chegar a un acordo antes de final de ano”. Neste sentido, apuntou que o último trílogo -é dicir, a negociación entre Comisión Europea, Consello e Parlamento Europeo-, terá lugar o vindeiro luns, polo que é previsible que o regulamento sexa aprobado a vindeira semana.
Ao respecto, na conferencia interveu o eurodeputado impulsor do Mecanismo Transfronterizo Europeo BRIDGEU. Sandro Gozi, quen avogou pola eliminación de trabas administrativas que impiden o crecemento das rexións transfronteirizas. Na súa intervención salientou asemade o traballo desenvolvido por Ana Miranda no Parlamento Europeo a respecto das negociacións deste regulamento, tal e como amosa a propia organización desta xornada de traballo.
Dinamismo transfronteirizo
No transcurso da xornada de traballo tamén se analizaron as diferentes experiencias das eurocidades diante dos obstáculos legais e administrativos da fronteira. Así, a alcaldesa de Tomiño, Sandra González salientou que os puntos de cooperación transfronteirizos estean en Galiza, !e non en Madrid”. Ademais, explicou o traballo desenvolvido na Eurocidade Tomiño-Cerveira, como por exemplo mediante a figura do Valedor Transfronteirizo para abordar os problemas da cidadanía relacionados coa cooperación transfronteiriza ou a coordinación das axendas culturais e deportivas entre as dúas vilas.
O tenente de alcalde de Verín, Diego Lourenzo, pola súa banda, sinalou a traxectoria da Eurocidade de Chaves-Verín, quen fixo tamén fincapé nesta coordinación entre as dúas vilas, aínda que puxo de releve a existencia aínda de coordinación en eidos como o sanitario ou o de transporte.
A alcaldesa do Rosal, Ánxela Fernández, fixo referencia á discriminación que padecen os traballadores transfronteirizos e salientou que a fronteira entre Galiza e o norte de Portugal é a fronteira que suma o 45% da mobilidade das fronteiras do Estado español, sendo a “fronteira máis dinámica”.
Este dinamismo transfronteirizo pon de manifesto diversos problemas, sinalados polo concelleiro do BNG en Tui, Xosué Campos; o portavoz do BNG na Guarda, Anxo Baz; a portavoz do BNG en Salvaterra, Patricia Mariño; e a representante do BNG das Neves, Rocío Barreiro. En concreto, Xosué Campos sinalou os problemas coas que se atopan os traballadores transfronteirizos tanto no eido sanitario como á hora de realizar a contratación dos traballadores e traballadoras.
Anxo Baz, pola súa banda, lamentou a perda da histórica conexión entre A Guarda e Camiña, mentres que Patricia Mariño denunciou a falta de contido da Eurocidade de Salvaterra - Monçao e a falta de interese por avanzar na súa execución. Ademais sinalou o grave problema que vive Salvaterra co tráfico pesado, que atravesa a rúa principal da vila e que se incrementa coa PLISAN. Finalmente, Rocío Barreiro fixo fincapé no medio ambiente e o problema da contaminación das beiras do río Miño e do propio río.
“A Unión Europea abriu avances no eido da cooperación transfronteiriza”, destacou na súa intervención, Xabier Macías, ex técnico da Eurocidade de Cerveira – Tomiño, quen criticou que ao Estado español non lle interesa que Galiza teña unha estreita relación con Portugal. “Os estados non van avanzar neste camiño se non se lles obriga”, asegurou.
