O Bloque Nacionalista Galego organizou un acto simbólico en defensa dos intereses produtivos enerxéticos de Galiza, dentro da campaña Nin Espolio, Nin Depredación. Enerxía eólica sustentábel, xusta e galega. Ademais de numerosos cargos orgánicos e institucionais contou coa presencia da viceportavoz do BNG e deputada por Lugo no Parlamento galego, Olalla Rodil, e a parlamentaria Carme Aira.
Para Olalla Rodil “o caso do encoro de Belesar é un dos exemplos máis claros do expólio ao que está sometido o nos país” xa que “a pesar da grande cantidade de enerxía eléctrica que produce, non supón ningún beneficio para a zona nin para os seus habitantes que pagan a luz ao mesmo prezo que en Madrid ou Sevilla”. Rodil aclarou que “as eléctricas son benefeciadas por un goberno do estado centralista que non obriga a un prezo da enerxía en función dos danos que fai nas zonas onde se produce”.
Ademais de criticar ao goberno do estado por pemitir un prezo da enerxía eléctrica desmesurado, o Bloque transmitiu a súa proposta de aplicar un novo plan sectorial eólico avogando pola ordenación e protección do territorio, no que os beneficios da produción repercutan na sociedade, a través da creación dunha empresa pública galega de enerxía e unha tarifa eléctrica galega que abarate a factura da luz das galegas e os galegos.
Olalla Rodil sinalou neste acto que o boom eólico que se esta a producir en Galiza reponde aos “plans das grandes multinacionais para espoliar a nosa riqueza, desde Abadín até Pedrafita existen proxectos que afectan a milleiros de persoas” ao que subliñou a afinidade do Partido Popular co empresariado deste sector “mentras Feijóo abraza aos lobby's eléctricos ou a ex-conselleira Beatriz Mato está na dirección de Greenalia, as galegas e galegos sofremos a factura da luz máis cara do Estado sendo produtoras” dixo Rodil.
Nesta liña, a nacionalista destacou que “este boom tiguido de falso verde quere saquear Galiza, desde o BNG propomos desenvolver un modelo sustentábel, xusto coa sociedade, aplicando medidas como unha tarifa galega que abarate a factura, que o rural sexa compensado polo impacto destas instalacións como merece e non se determine a súa expulsión do territorio e que se vinculen os puntos de produción con proxectos industriais”
