A deputada do BNG, Montse Prado denunciou a “prepotencia do Partido popular” que impediu na reunión da Deputación Permanente a comparecencia do goberno en relación ás previsións contra o coronavirus, solicitada polo BNG.Prado explicou que a viceportavoz do BNG, Olalla Rodil deu lectura ao artigo do articulado do Parlamento para xustificar a introdución de solicitude de comparecencia do Conselleiro de Sanidade para explicar a situación do coronavirus en Galiza e as previsións do goberno.
Mensaxe de tranquilidade
Montse Prado insistiu en que hai que transmitir “unha mensaxe de tranquilidade” porque, a día de hoxe “non hai motivo para a alarma” pero a maneira de combater o medo, engadiu é “con información veraz”. É necesario coñecer “as medidas de contención” tomadas polo goberno e nesa liña ía a nosa petición para que comparecera o conselleiro de sanidade.
Para a deputada, o goberno galego contou con máis tempo que outros gobernos para actuar sen embargo, foi hoxe cando o Comité de saúde e hixiene laboral foi convocado por primeira vez e continúan reunidos os traballadoras e traballadoras, a pesar de que a primeira medida sempre é “coidar ás persoas coidadoras”. A día de hoxe, os traballadores e traballadoras públicas só recibiron un correo, pero descoñecemos con que información e formación contan así como que medios de protección se puxeron en marcha.
Prado lembrou a recente experiencia do évola e apelou a non incorrer nos mesmo erros como a falta de espazos suficientes para o illamento, e falta de recursos humanos e de medios.
Prado pide protección para os galegos e galegos fóra de Galiza
A deputada do BNG mostrou a súa preocupación polo gran número de galegos e galegas que se atopan fóra de Galiza destacando aos estudantes de Erasmus e oito galegos con dous menores nas Illas Canarias nun hotel en corentena dende o 24 de febreiro. Mentres os consulados facilitaron os traslados de persoas doutras nacionalidades, os galegos e galegas afectados, non recibiron ningunha información sobre o remate da corentena o vindeiro día 10 de marzo. Non saben dixo, Prado, si os someterán ao tes de verificación do virus, como serán desprazados a Galiza e si contan co certificado para embarcar como exixen as empresas de aeroliñas.
“Consideramos que existen motivos dabondo para que o conselleiro Almuíña compareza no pleno. Dende o BNG pedimos transparencia pero unha vez máis o PP impide que o titular de sanidade dea explicacións sobre a verdadeira situación e medidas en Galiza contra o coronavirus”, concluíu.
