A portavoz de Cultura do BNG, Mercedes Queixas critica que a Xunta “renuncie á internacionalización da cultura galega” e lembra que a Asociación de Editoras non estará presente no stand da Xunta nas vindeiras feiras internacionais do libro de Barcelona e Frankfurt” e anuncian que asumiran a xestión da súa participación., ante a falta de apoio do goberno galego.
Para a deputada do BNG, esta decisión confirma “o abandono do goberno de Feixóo do sector editorial galego”.
Mercedes Queixas afirma que o goberno do PP galego é “incapaz” de atender as demandas do sector que reclaman “un cambio de modelo de xestión nas feiras internacionais do libro”, dende hai tempo caracterizado pola “inxerencia” da Xunta no carácter profesional das feiras e a falta de “visibilidade e apoio” para a súa internacionalización.
En opinión da nacionalista, este é un novo episodio sumado ao “escándalo” das axudas á tradución que confirma a falta de estratexia dunha política da internacionalización da literatura e cultura galega no mundo.
Dende o BNG, recalca Queixas, reiteramos o noso compromiso coa creación literaria e cultural galega e continuaremos demandando a creación do Instituto Rosalía de Castro como ferramenta de internacionalización da nosa lingua e da nosa cultura.
Por outra lado, asegura que resulta moi chamativo que xusto coincidindo co recoñecemento internacional máximo da cultura galega, grazas as Tanxugueiras, a Xunta renuncie a internacionalización da nosa cultura expresada a través da creación literaria. Mercedes Queixas anuncia o rexistro de iniciativas para dar resposta ás demandas do sector do libro e por un cambio de modelo que permita a internacionalización da literatura e cultura galega.
