A portavoz nacional do BNG, e Ana Pontón, propón á Xunta a aprobación urxente “dunha gratificación extraordinaria” para todo o persoal sanitario como compensación polo “grande esforzo e risco de contaxio” na crise da Covid-19.
Considera que o persoal sanitario, “non só merece o aplauso que recibe da cidadanía todos os días dende as fiestras e balcóns”, tamén é necesario que ese recoñecemento parta da administración e nese sentido reclama da Xunta a aprobación dunha “gratificación extraordinaria”. Por outra parte, exixe da administración “garantías de protección” e poñer punto final “a precariedade” que sigue producíndose no sistema sanitario.
O mellor aplauso a todos e todas as traballadoras da Sanidade pública, recalca Pontón e defender os seus dereitos e “unha sanidade sen recortes nin privatizacións”.
A portavoz nacionalista reitera que todo o persoal sanitario “está dando o mellor de si”, a pesar das circunstancias nas que desenvolven o seu traballo como constatan as denuncias dos traballadores e traballadoras. Sigue sendo motivo de preocupación que a día de hoxe, continúen sen o material de protección suficiente e axeitado contra o risco de contaxio por Covid-19, falta de axilidade á hora de facer as probas necesarias no caso de contaxios, fallan os protocolos, mestura no mesmo cuarto de pacientes sans con pacientes contaxiados de coronavirus e que no medio desta pandemia a Xunta siga precarizando ao persoal sanitario.
Almuíña debe explicar os despidos do persoal tras contaxiarse da Covid-19
Pontón salienta que segundo a denuncia da CIG, o SERGAS despediu a persoal temporal que contraera o coronavirus. “Se ben a Xunta rectificou, o simple feito de que isto pasara é dunha enorme gravidade e deixa ao descuberto unha política laboral que non podemos compartir baixo ningunha circunstancia”. Que pasaría se ninguén o denunciara? Seguiría o Sergas despedindo persoal que se contaxiou traballando? O simple feito de que isto pase merece unha explicación en sede parlamentaria, polo que o Conselleiro de Sanidade ten que comparecer no Parlamento.”Urxe ademais, a restitución dos dereitos de todos e cada unha das persoas que foron despedidas, é dicir, que a rectificación ten que ter carácter retroactivo”, aseverou.
Ademais, Pontón denuncia que a precariedade laboral na sanidade pública tamén inclúe os contratos do SERGAS aos e ás MIR polo que volve a reclamar medidas urxentes para rematar coa precariedade na sanidade.
