A parlamentaria do BNG, Olalla Rodil preguntou ao goberno que vai facer ante a situación das traballadoras e traballadores da empresa Mersant Vixilancia que subministra os servizos de seguridade a centros dependentes da Consellaría de Política Social e que non perciben os seus salarios desde decembro de 2021, incluída a paga extraordinaria.
A deputada explicou que, os 17 centros afectados por esta irregularidade salarial , están situados nas diferentes provincias galegas e abarcan Residencias de maiores, menores, casas do Mar, centros educativos, de protección de menores e persoas con discapacidade. Esta situación, afirmou a nacionalista é coñecida pola Xunta porque xa foi denunciada ante o Tribunal administrativo de contratación pública, a Consellaría de Política Social, a Inspección de Traballo e a través de diversos escritos dirixidos aos grupos parlamentarios.
“Pero ademais, a Xunta de Galiza sabe e sabía o que está pasando porque nin sequera é a primeira vez que Mersant vulnera os dereitos salariais e laborais das traballadoras e traballadores” e lembrou que o Convenio colectivo sinala que as retribucións do persoal deberán aboarse por meses vencidos nos tres primeiros días hábiles e dentro, en todo caso, nos cinco primeiros días naturais de cada mes.
Esta empresa, explicou a deputada “ é ben coñecida en Galiza e fóra de Galiza” por acometer “impagos na seguridade privada” dos hospitais de Valdeorras e Verín, proceder que tamén mantivo no concello de Sevilla que impuxo unha Sanción municipal a Mersant Seguridad por “impagos a la plantilla y a la Seguridad Social” ,o 12 de febreiro acordando impoñer “unha penalidade" de 17.400 euros a la unión temporal de empresas (UTE) “adxudicataria do contrato correspondente á vixilancia e seguridade dos colexios públicos da cidade e dos centros de educación permanente, por non estar ao corrente no cumprimento das súas obrigas coa Seguridade Social” e “retrasos” no abono das nóminas da plantilla.
A pesar de coñecer os antecedentes da empresa, que fixo a Xunta? preguntou a deputada do BNG porque non atendeu as solicitudes de reunión presentadas diante da Consellaría, nin actuou contra a empresa concesionaria por vulneración dos dereitos laborais e salariais dos traballadores.
En opinión da nacionalista, a Xunta é “responsable” da “durísima situación” de moitas traballadoras e traballadores e en troques de actuar, “mirou para outro lado”. O único que fixo a Xunta replicou Rodil, foi subcontratar outros traballadores a outra empresa : Sasegur. Un proceder sobre o que temos as nosas dúbidas de que sexa legal, porque a lexislación estabelece que non se pode contratar o mesmo servizo a dúas empresas diferentes.
Desde o BNG pedimos, “ a resolución inmediata do contrato coa empresa” de acordo co disposto na Lei de contratación do sector público que habilita á administración pública a rescindilo por “falta de pagamento dos salarios durante a execución do contrato” , así como a adopción de medidas para que este tipo de “empresas piratas” non podan continuar co seu modus operandi. Para impedilo, é necesario introducir “cláusulas sociais” para actuar sen demora cando a administración é coñecedora da máis mínima vulneración dos dereitos dos traballadores.
