A eurodeputada do BNG, Ana Miranda, defende que a Comisión Europea debería ser mediadora na situación da multinacional Alcoa, igual que xa fixo a respecto de outras empresas, “posto que hai máis de 4.000 postos de traballo directos e indirectos en xogo tanto en Galiza como en Asturias”, apuntou.
“A Comisión debería instar ao Estado español a paralizar o Expediente de Regulación de Emprego, xa que incumpre toda a normativa laboral, e a realizar un control público da empresa, tal e como está previsto na propia Constitución, e tal e como se fixo cos bancos”, manifestou a deputada nacionalista tras participar xunto a outros eurodeputados e eurodeputadas na xuntanza que mantiveron os comités de empresa das plantas de A Coruña e Avilés e a representante do gabinete da Comisión de Emprego.
Ana Miranda lembra que a Comisión Europea actuou no mercado do aceiro, polo que ao seu xuízo tamén pode facelo no mercado do aluminio, “aínda que tería que abrir un marco regulatorio novo”. Neste sentido afirmou que “sería importante que o abra, posto que Alcoa é a única empresa con monopolio”.
Segundo explicou Miranda, a propia Comisión insta a que se prolongue o proceso para ter unha maior marxe de manobra. “Non imos permitir que se pechen estas empresas en Galiza e Asturias para logo mercarlle o aluminio a Arabia Saudita”, asegurou a eurodeputada nacionalista ao tempo que resaltou a forte mobilización social que se está producindo en A Coruña e Avilés na defensa dos postos de traballo.
Pregunta escrita
Xa no pasado mes de outubro Ana Miranda trasladou unha pregunta escrita á Comisión Europea, na que constataba a incoherencia da multinacional, que alega perdas económicas pese a ter recibido nos últimos catro anos máis de 500 millóns de euros de fondos públicos.
Nesta iniciativa Ana Miranda defende asemade a necesidade de garantir a competitividade das empresas asentadas en Galiza, xa que considera que é tremendamente prexudicada polos elevados custes da electricidade.
