Ana Pontón chama á participación da mocidade: “Votade con rebeldía e a favor dun futuro neste país”

A portavoz nacional, Ana Pontón, tivo oportunidade de rememorar a súa etapa como estudante  vinte anos atrás nun encontro con xente nova nun piso de estudantes en Santiago de Compostela, onde compartiu café e conversa sobre as cuestións que lle preocupan a xuventude do país: precariedade, desemprego ou emigración, bolsas escasas que tardan en cobrarse, a violencia machista entre outros.

Un encontro que Pontón aproveitou para facer un chamamento á participación da xente moza o 28A e a facelo ignorando aos que propagan o discurso do medo.

“Animar a todos os mozos e mozas galegas a que participen nas eleccións desde a rebeldía e favor de ter futuro neste país, con rebeldía, que non se deixen levar por esa cantinela do voto útil que o único que pretende é que nos conformemos co mal menor e, sobre todo, que non se deixen levar pola política da crispación e do medo, única proposta que ten a dereita nestas eleccións”, salientou.

“Estou segura que a mocidade vai ser a clave para que o 28A Galiza conte no Estado e iso se traduza en máis oportunidades para a xente moza, que signifique un revulsivo para este país e que sexamos capaces de devolverlle unha voz a Galiza nun momento excepcional”, recalcou.

No café cos mozos e mozas, -“vexo que vinte anos despois sigue habendo pisos sen calefacción como na miña época”-,  apelou á mocidade galega que quere facerse escoitar no Congreso a partir do próximo domingo. “Sei que vai haber un voto rebelde e que hai moita xente nova que o 28 de abril quere ir votar con ilusión, con convicción neste país, porque temos moito que gañar se confiamos nas nosas propias posibilidades”, recalcou.

A líder nacionalista animou á mocidade a ser motor “dos cambios necesarios para que non limiten o voso futuro á precariedade ou a marchar como única opción laboral, cambios para mellorar o sistema educativo con máis bolsas de estudo e maior dotación, que pondere máis o nivel de renda das familias á hora de concedelas e non tanto o expediente, porque se trata de facilitar o acceso ao ensino superior con independencia da familia, labrega ou empresaria. E, igualmente, que esas bolsas se xestionen desde Galiza para que cheguen antes ás persoas beneficiadas”, explicou.

A mobilidade foi outra das cuestións abordadas, reclamando un transporte por tren de proximidade con horarios e prezos razoables, “non esas tarifas desorbitadas por exemplo no traxecto entre Ourense e Santiago”. Asuntos dos que non falaron as forza estatais “que agora veñen en campaña a pedir o voto”, lembrou. Contra ese agravio pediu dar unha resposta clara nas urnas o 28A.

No encontro tamén participou a candidata á Alcaldía de Santiago, Goretti Sanmartín, e o candidato ao Congreso pola Coruña, Nestor Rego, quen se mostrou convencido de que a mocidade “parará a esa dereita carca e antigalega que representa Vox e Cs aos que o BNG disputa escanos en Coruña e Pontevedra”, salientou.

“Temos unha mocidade sensible ao que está pasando no país, que quere derrogar a LOMCE, defende unha universidade publica de calidade, que quere que traballemos para darlle unha oportunidade de futuro, que está preocupada pola situación política,  pola involución democrática, pola perda de dereitos e liberdades e todo iso vaise expresar nas urnas o 28 A”, concluíu.