En resposta ao BNG, o conselleiro de Industria desentendese da liquidación de Pescanova

A deputada do BNG, Carme Adán formulou unha pregunta sobre a responsabilidade do Goberno na perda dunha das máis importantes empresas galegas

A deputada do BNG, Carme Adán lamentou hoxe que non forme parte da “folla de ruta da Xunta de Galiza” o futuro de Pescanova, unha das máis importantes empresas galegas en proceso de liquidación.

Adán formulou unha pregunta parlamentaria ao titular de Industria sobre as actuacións da Xunta de Galiza ante a situación de Pescanova e as previsións, a partir de agora, máis alá das “boas intencións” que do conselleiro de Industria cando é interpelado por esta cuestión.

A deputada lembrou a “valentía do goberno bipartito” ao non autorizar a planta de Touriñán instalada, tras a negativa do goberno, na localidade de Mira, (Portugal) que finalmente, dixo, “resultou un estrepitoso fracaso” e posiblemente o inicio da ruína do grupo empresarial.

O Goberno bipartito, remarcou non “sucumbiu a chantaxe da piratería empresarial” e con esa medida non foi destrozado “un recurso natural de gran relevancia a cambio de nada”. Adán criticou que a valentía do PP só se poña de manifesto para defender o aceite andaluz pola súa consideración de estratéxico para a economía mentres Pescanova, “non goza dese carácter para o Partido popular”.

A deputada ironizou sobre a preocupación do presidente Feijoo pola empresa Pescanova e lembrou que o propio conselleiro parabenizou un plan de viabilidade, “criticado no momento no que nacía”. O goberno galego debe responsabilizarse dunha empresa que recibiu moitos millóns de fondos públicos e deben poñer en marcha todos os mecanismos para que Pescanova sexa viábel, reiterou.

A deputada concluíu a súa intervención demandando do Goberno galego medidas concretas para aquelas empresas que reciben axudas públicas e asumilas como “públicas” cando son rendibles e non malvendelas.