Lobeira acusa a Mar de presentar a PPC como un "trunfo" cando foi unha "derrota" para Galiza

O deputado do BNG afirma que a PPC consagra o peor das pautas de actuación de Europa respecto da frota do País, pondo en risco o futuro de boa parte da mesma.

Bieito Lobeira lamentou que a conselleira de Mar e Medio Rural, Rosa Quintana, cualificara de “netamente” positivos os resultados dos acordos obtidos no Consello de Ministros da UE sobre a nova Política Pesqueira Común e os presentara como un trunfo “cando son un fracaso e unha derrota en toda regra”.

O deputado, logo da comparecencia en pleno da conselleira, afirmou que os ditos acordos consagran o peor das pautas de actuación históricas da Unión Europea contra os intereses pesqueiros galegos.

O parlamentar criticou especialmente que se manteña o cerne da discriminación da frota do País, é dicir, o principio de estabilidade relativa, que é o que determina quen pode pescar e quen non, con que topes, malia non responder a ningún criterio lóxico, asegurou.

Para o deputado nacionalista, o máis grave non é só que se manteña este principio, senón que máis unha vez o goberno do Estado non se opuxo ao mesmo, non presentou ningunha emenda na súa contra, “sacrificando así os intereses galegos mentres primaba a outras zonas, como o Mediterráneo”.

Despece de buques

Neste sentido, lamentou que o goberno da Xunta asuma sen máis os argumentos do Estado de que non se pode facer nada e teime en salientar como un logro o mantemento das axudas e subsidios para o despece de buques, “unha opción que pode ser positiva en casos individuais pero non do ponto de vista colectivo”.

O goberno do Estado non presentou ningunha emenda relativa a Galiza e contraria ao tan lesivo principio de estabilidade relativa

“A súa non é a posición de Galiza, é a posición do PP”, reprochou á conselleira e instouna a que esixa ao goberno do Estado que non defenda o principio de estabilidade e que presente un recurso ante o Tribunal Superior de Xustiza da UE contra o mesmo, do contrario boa parte da frota galega non poderá resistir.

Selección Española

Bieito Lobeira explicou que a propia UE recoñece que non ten dados de como están as capturas nun 54 por cento dos caladoiros “e aínda así non nos deixan pescar, claro que dá igual, porque para iso está a selección española”.

O deputado concluiu alertando de que o Consello de Ministros de Pesca da UE é unha “casa dos horrores”, un “akelarre” para promover o pánico e o terror no sector pesqueiro galego.