Jorquera: “Menos minutos de silencio e máis acción contra a violencia machista"

O asasinato dunha muller, a mans do seu home, no Hospital de Ourense e a falla de seguridade das vítimas de violencia de xénero será tratado no vindeiro pleno, á iniciativa do BNG

 O portavoz parlamentario do BNG, Francisco Jorquera avanzou hoxe, na comparecencia ante os medios de comunicación tras a reunión da Xunta de portavoces que, o BNG defenderá unha Proposición non de lei sobre a muller asasinada “por violencia machista” no Complexo Hospitalario Universitario de Ourense.

Para Jorquera, o acontecido resulta un “caso escandaloso” que revela a incapacidade das administración para protexer “a vida das mulleres vítimas de malos tratos” polo que reclamou “menos minutos de silencio e máis acción” ante a morte dunha muller “vítima por terrorismo machista”.

Neste sentido demandou intensificar os medios contra a violencia de xénero para asegurar a protección das vítimas e esixiu “responsabilidades” polo acontecido.

Asuntos que serán debatidos na vindeira sesión plenaria

O portavoz parlamentario nacionalista deu conta das diversas propostas do BNG para a vindeira sesión plenaria entre as que destacou: As deficientes condicións laborais dos traballadores das subcontratas das operadoras de telecomunicacións, conflito,dixo, no que a Xunta “segue a mirar para outro lado” mentres as grandes operadoras acumulan cada vez máis beneficios e unha Proposición non de lei relativa ao funcionamento e tarifas dos servizos ferroviarios en Galiza.

Asemade, serán debatidos outros asuntos sobre o Decreto da Reválida, as sentenzas referidas á reincorporación do Profesorado que impartía os cursos CELGA de Galego para adultos e a pregunta ao Presidente sobre como valora que seis de cada dez galegos consideren “negativa a xestión da Xunta”.