Feijóo ten que asumir xa a investigación das Caixas
Ana Pontón emprazou este Mércores ao presidente da Xunta, Alberto Núñez Feijóo, a que asuma as súas responsabilidades e traballe para garantir o futuro do sistema financieiro galego, pois se antes do resgate á banca este futuro xa estaba en xogo, agora se pode certificar a súa defunción, afirmou.
Para a voceira parlamentar, o presidente da Xunta ten que deixarse de frivolidades e apostar por propostas concretas, como as que lle prantexa o BNG, que pasan por unha comisión de investigación no Parlamento, porque os galegos e galegas teñen dereito a saber que pasou coa xestión da caixas e cales son as responsabilidades políticas desa xestión, e por unha banca pública galega.
O resgate á banca non é unha boa noticia para NGB, certifica a súa defunción
Medo a investigar
Aposte pola verdade e a transparencia dixo- deixe as escusas e levante o veto á creación da comisión. Vostedes levan meses negando e votando en contra da mesma, porque sabe que si hai responsabilidades e que mesmo poden ser penais, por iso non queren que se investigue.
Banca pública
Sobre a banca pública, Ana Pontón asegurou que é a única alternativa para superar un modelo ao servizo dos mercados que fracasou, como se está comprobando estes días co resgate, e que levou á ruina a milleiros de persoas, tanto en Europa como non País.
Para a voceira parlamentar, se Feijóo non asume a proposta nacionalista estará sendo cómplice do espolio do aforro galego e estará demostrando que prefire ser sumiso á banca e á direción do PP en Madrid antes que exercer de presidente da Xunta.
Feijóo non pode dar lecións de coherencia porque o PP apoiou todos os bandazos normativos das reformas financieiras
Se vostede non fai nada engadiu- convertirase en mero espectador dunha situación moi grave. A Banca pública é a única alternativa para ter un instrumento que financie o noso tecido produtivo, unha banca sen escándalos como o das preferentes.
Incoherencias do PP
Ante a teima de Feijóo de fuxir do debate e culpabilizar de todo aos demais, lembroulle que non está en disposición de dar lecións de coherencia, pois os únicos pactos que se deron ao redor das caixas e das reformas financieiras foron entre o PP e o PSOE.
Ana Pontón refrescou a memoria do presidente da Xunta e puxo enriba da mesa o apoio do PP a todos os bandazos normativos que levaron á desaparición das caixas; o respaldo á súa bancarización; lembrou como foi o PP o que deixou sen efecto a lei de Caixas e como liderou un proceso de fusión que o BNG non apoiou polos seus riscos para o futuro das entidades.
Asemade, fixo referencia á reciente votación no Congreso na que se pedía a transferencia da participación no FROB a Galiza e PP e PSOE se negaron, non sabemos que opina vostede do sentido de voto dos deputados do seu partido electos por Galiza.
Rescatan á banca, rouban ao pobo
Os deputados do BNG volveron facer público o seu rexeitamento contra o resgate á banca amosando dende as bancadas uns carteis da campaña Rescatan á banca, rouban ao pobo.
Se nos dixo que non había cartos para a sanidade, nin para a educación ou para pagar aos afectados polas preferentes e agora imos ter que pagar 100.000 millóns de euros con novos recortes e maior endebedamento, sen que os cidadáns saibamos a verdade nin teñamos dereito a opinar, concluiu a deputada.
http://youtu.be/qiD39cdgoAk