O BNG propón ao Goberno galego crear unha Corporación Industrial Pública

Carme Adán defendeu integrar na corporación a todas as empresas públicas e participacións en sociedades mercantís das que sexa titular a Xunta

A deputada do BNG, Carme Adán defendeu hoxe na comisión de Industria crear unha Corporación Industrial Pública galega co fin de incorporar a todas as empresas públicas e participacións en sociedades mercantís das que sexa titular a Xunta de Galiza así como as entidades do sector público autonómico e os centros de traballo de empresa públicas dependentes da administración central do Estado que sexan transferidos ao Goberno galego.

A parlamentaria agradeceu o apoio dos grupos socialista e AGE á iniciativa nacionalista e lamentou que o PP se negara a reconsiderar a proposta por entender que o IGAPE e Xesgalicia xa cumpren ese papel.

A situación económica e industrial de Galiza, explicou a parlamentaria, fai necesario tomar medidas encamiñadas a resolver a crise dos sectores produtivos galegos e nese sentido, manifestou, o BNG considera que a iniciativa defendida hoxe pode, en grande medida, colaborar nesa liña.

“Nas comisións parlamentarias hai que debater propostas e por iso traemos hoxe a creación dunha Corporación Industrial galega que formaría parte do Instituto de Crédito galego”. A situación industrial precisa de alternativas nunha situación caracterizada pola acumulación de “caídas importantes” dende o 2009 e agravándose no último ano nun 8,3%, mentres o Partido popular segue tentando convencernos da “suposta recuperación”.

 “Fiasco” so sector eólico e negativos datos en  exportacións e filiación á Seguridade social por ramas industriais.

A deputada remarcou que a iniciativa do BNG “supera a política de subvencións ás empresas” e resulta unha aposta para saír da grave situación económica se ademais vai acompañada da creación dun Instituto galego de Crédito.

Pola súa parte, o portavoz popular, Hipólito Fariñas anunciou o voto en contra do PP por entender que “ non se pode defender ese modelo intervencionista” aínda que coincidiu na diagnose realizada pola deputada en relación ao desemprego e a situación industrial pero Galiza, afirmou, xa está a desenvolver un modelo propio dende o IGAPE e XesGalicia.

Fariñas cualificou de “ousadía” a proposta do BNG porque “despreza os clusters que xa existen”.

Na quenda de réplica, Adán respondeu ao voceiro popular que o actual modelo só serve para que as consellerías fagan “autobombo” pero non ofrecen alternativas á industria galega, “nós traemos unha proposta a debate porque o que hai non é eficaz”. A política de subvención, reiterou, “non garante o emprego nin a viabilidade das empresas”.