O BNG pide paralizar a campaña publicitaria de Industria por ser un “despilfarro de cartos públicos”

Carme Adán cualifica de “autobombo” a iniciativa e denuncia que pretende agochar “a inactividade no eido económica e industrial” polo que pide a súa inmediata parlalización

A deputada do BNG, Carme Adán rexistra varias iniciativas sobre a contratación dunha campaña publicitaria: A economía de Galicia como principal impulsora do desenvolvemento e o emprego dunha terra recoñecida como “Galicia Calidade” por un importe de 1.157.024 euros sen IVE.

Adán cualifica esta iniciativa de “despilfarro de cartos públicos” polo que pide a súa inmediata paralización.

Para a deputada , a campaña de “autobombo” do Goberno é un insulto a todas ás persoas e empresas afectadas pola crise económica e, na súa opinión, só pretende agochar a inactividade económica e industrial galega con “empresas abocadas ao cerre, Pescanova en mans da Banca, liquidado o sistema financeiro galego e emigrando o talento do noso país”. Ante esta realidade, a deputada considera que a Consellería de Industria pretende disfrazar a situación contratando unha campaña de publicidade valorada en 1.157.024,79 euros sen IVE.

A parlamentaria asegura que a Consellería de Industria non pode “gabarse” dos resultados do tecido económico e industrial galego e explica na iniciativa que no mes de marzo do 2009, data que Núñez Feijóo gaña as eleccións, eran 163.214 os afiliad@s á Seguridade Social no sector industrial fronte os 127.678 do ano 2013, as ramas ligadas ao téxtil tamén experimentaron unha caída ao igual que o sector da madeira e a fabricación de produtos metálicos.

Por outra parte, o emprego industrial perdeu máis do 10% do seu peso total no emprego de Galiza e agora o Goberno do Partido popular quer poñer en marcha unha campaña “fora de toda lóxica” para publicitar a “inactividade” económica galega.