O BNG esixe medidas contra os residuos dunha empresa no Monte dos Nenos

Ana Pontón considerou “insuficientes” as explicacións do secretario xeral de Medio Ambiente, Justo de Benito polo que solicitou os resultados dos residuos analizados

A parlamentaria do BNG, Ana Pontón solicitou hoxe os resultados das análises realizadas pola consellería de Medio Ambiente e reclamou medidas contundentes contra o deposito de residuos en diferentes lugares da comarca de Ferrolterra.

A través dunha pregunta parlamentaria sobre a retirada das verteduras industriais, Pontón cualificou de “insuficientes” as explicacións do secretario xeral da Consellería de Medio ambiente, Justo de Benito polo que solicitou a documentación dos “ resultados das análises” realizadas aos residuos.

A deputada explicou que existen evidencias de vertidos contaminantes nos solos e augas o que constitúe “un grave problema medioambiental” e para a saúde das persoas.

Temos constancia, dixo, que nas zonas onde se producen as verteduras víronse afectados pozos de auga para o consumo que obriga aos propietarios/as a “mercar auga embotellada” sen que por parte dos concellos e a Xunta achegaran algún tipo de alternativa á falta de subministro de auga para o consumo.

Son toneladas de residuos as que se depositan en diferentes montes da comarca de Ferrolterra cun “cheiro nauseabundo” e tapando os prados. Ademais, as persoas que denunciaron esta situación foron ameazadas pola empresa. Entre as denuncias, lembrou, o propio Valedor do Pobo manifestou que a Xunta e os concellos non lle remitiran a documentación solicitado sobre este asunto.

A deputada referiuse aos residuos do Monte dos Nenos en Narón e os verquidos das Somozas e Das Pontes, residuos afirmou, que aínda non foron retirados, “na súa totalidade, segundo confirmou a propia Xunta.

Na quenda de réplica, a nacionalista reiterou a petición dos datos dos resultados das análises e amosou diferentes fotografías para demostrar que nos lugares referidos os “camións seguen depositando residuos e mesmo enterrándoos” , demais, non sabemos si a apertura de viais nos montes para facilitar o paso dos camións conta coa autorización preceptiva da Xunta.

Finalmente, a parlamentaria esixiu “responsabilidade” ante un feito que considerou “moi grave” tanto para o medio ambiente como para a saúde das persoas.