BNG, ERC E Amaiur levan ao Congreso o debate sobre o dereito a decidir dos pobos

A portavoz do BNG no Congreso, Olaia Fernández Davila, participou hoxe xunto co portavoz de ERC, Alfred Bosch, e o portavoz de Amaiur, Xabier Mikel Errekondo na rolda de prensa para apoiar a proposición de lei de ERC sobre o dereito de autodeterminación dos pobos.

Davila explicou que o BNG “como forza nacionalista defendeu sempre o dereito dos pobos a decidir libremente o seu futuro. É un dereito inalienábel de todos os pobos”. A portavoz nacionalista deixou claro que o BNG “comparte esta proposición de lei porque partimos dese principio básico, e o dereito a celebrar un referendo sobre a autodeterminación”.

Nese sentido, Davila puxo de manifesto que esta iniciativa “chega nun bón momento, parte dun momento no que o Parlamento catalán decidiu por maioría proceder á celebración dun referendo sobre a autodeterminación, algo que sempre estivo entre os principios do BNG”.

Lembrou a parlamentar do BNG que as nacións de Galiza, Euskadi e Catalunya mesmo son recoñecidas na Constitución española como nacionalidades históricas. “Por iso, tamén defendemos o dereito de Galiza a decidir o seu futuro libremente como nación”.

“É importante que no Congreso haxa un debate sobre autodeterminación”

A deputada nacionalista resaltou a importanza de que “hoxe traiamos ao Congreso a posibilidade de poder debater nun Pleno o dereito á autodeterminación. É un debate importante, e é importante que poidamos pronunciarnos nas Cortes do Estado. Somos conscientes de que no caso de que esta proposición fose admitida a trámite, podería enriquecerse e mellorarse coas aportacións de todos”.

A preguntas dos xornalistas sobre a posibilidade de que a Mesa do Congreso vetase siquera o debate da proposición de lei, Davila afirmou que “non vexo razón para que non fose admitida a debate esta proposición de lei. Desde un punto de vista democrático elemental, non sería razoábel que se puxeran obstáculos e impedimentos para o simple feito dun debate. Sería unha posición tremendamente antidemocrática”.

Asemade, os portavoces de BNG, ERC e Amaiur dixeron aos xornalistas que “houbo unha resposta positiva a esta proposición de lei por parte de CIU, PNV e ICV. Lóxicamente o PP e UPyD se opoñen”.