Xavier Vence afirma en Vilagarcía que "o pobo está a sufrir extrema violencia económica"
-Vence denunciou que o PP está a criminalizar ás persoas estafadas polas preferentes que protestan diante a inxustiza que padecen
Vilagarcía, 12 de xuño de 2013.- No marco da campaña Non é unha crise, é un roubo, o Bloque Nacionalista Galego celebrou esta tarde un acto en Vilagarcía, no Auditorio Municipal, no que participaron o portavoz nacional do BNG, Xavier Vence, a deputada no Parlamento Galego, Montse Prado, e a portavoz municipal do BNG en Vilagarcía, María Villaronga.
Xavier Vence afirmou no acto celebrado en Vilagarcía que coas últimas novas da quitación das preferentes consúmase a estafa das preferentes. A xente vaise quedar sen o seu diñeiro nunha porcentaxe que vai desde o 39 ao 68 %, o que supón que arredor de 40.000 persoas afectadas non van poder acollerse á arbitraxe. Vence asegurou que xa non é só un problema persoal ou familiar senón que é un problema de país, xa que hai que ter en conta que ten unha magnitude de 520 millóns de euros, o 0,5% do PIB, un diñeiro que se cae do consumo e, polo tanto, fica á marxe da produtividade para a dinamización do país. Isto é unha expresión extrema de violencia económica e de poder do sistema financeiro contra a cidadanía, como o demostran episodios que vemos cada día de persoas que viven ao límite da emerxencia social.
O portavoz nacional do BNG afirmou en Vilagarcía que o PP está a sacar un rendemento particular desta grave crise económica e social: estaa aproveitando para xustificar todos os recortes en materia de servizos sociais e benestar no único argumento da crise, sometendo ao pobo galego a recortes en servizos sociais e laborais acadados coa loita social durante moitos anos e que nos retrotraen a décadas pasadas, demostrando que o único criterio usado é seguir os ditames das políticas neoliberais fronte as que agochan a cabeza e cumpren sen protestar.
O portavoz nacional do BNG explicou que no Parlamento seguen tentando encubrir o que ocorreu nas caixas galegas, como manifesta o seu escurantismo na comisión para o control das caixas, na que o PP non quixo facer público o informe de auditoría das caixas que realizou a consultora KPMG antes da fusión e que avalaba a fusión, sendo o argumento basicamente no que se amparou Feijoo, e tampouco quere deixar ver publicamente os documentos nos que se consignaban as millonarias indemnizacións dos exdirectivos, polo que a actitude do PP queda ben clariña.
Por outra banda, o portavoz nacional do BNG congratulouse do éxito rotundo da folga convocada na comarca de Ferrol. Ao mesmo tempo, Xavier Vence laiouse de que o éxito da convocatoria, desafortunadamente, vén dada pola resposta a unha situación ao borde do límite da cohesión social. Que esta manifestación fose multitudinaria fai ver que toda a sociedade desta comarca é consciente da situación extrema na que está a vivir. E fronte a isto, temos que denunciar unha vez máis que o PP só está a tomar medidas que prexudican aínda máis a situación das familias que ven recortados os seus dereitos e prestacións sociais.