Vence critica as medidas de Rajoy porque "renuncian a loitar contra o paro e abandonan aos parados"
O portavoz nacional do BNG, Xabier Vence, amosouse moi crítico co denominado Programa Nacional de Reformas aprobado hoxe polo Consello de Ministros porque deixan en evidencia que o Goberno de Rajoy renuncia a loitar contra o drama insostíbel do paro, e abandona literalmente aos 6.202.700 de desempregados.
O portavoz nacional do BNG pón de manifesto que o día despois de coñecer os dados da EPA, o Goberno demostra que non está no que ten que estar que é combater o paro. Non é unha prioridade para o Executivo porque o mesmo Guindos recoñece que son medidas para medio prazo. Ademáis, insisten na mesma liña de política económica, a obsesión polo défice e a consolidación fiscal que levaron a máis de seis millóns de parados. Non abandonan o austericidio e os recortes, co cal o futuro será máis do mesmo: máis paro, máis recesión, máis empobrecemento, unha brutal caída do consumo, e unha economía atrapada na crise.
A reforma laboral debe ser anulada e non avaliada
O portavoz nacional do BNG subliña que o pouco que adiantan en tema laboral se reduce a un Plan Anual de Emprego para avaliar os efectos da reforma laboral. Preguntémonos canto tempo máis precisan para recoñecer o fracaso estrepitoso desta reforma? Non é o momento de avaliacións, é o momento de retirar xa unha reforma con efectos perniciosos: é unha fábrica de creación de parados.
Renuncian a incentivar o consumo interno
Para Vence cuestións como o Plan de internacionalización de emprendedores demostra que o Goberno renuncia a incentivar o consumo e a demanda interna, e fan unha aposta ficticia porque tratan de desviar a atención cara o señuelo das internacionalizacións. Traen proxectos de lei que xa anunciaron no seu día, algúns deles invaden claramente as competencias autonómicas como a Lei de Mercado Único e continúan no camiño da centralización.
Os impostos especiais págaos todo o mundo
No que atinxe á racionalización da Administración, sinala Vence que cargan contra os pequenos concellos e premian ás deputacións. Os concellos son a administración máis cercana á cidadanía, a máis directa en atención á xente, e as deputacións xa sabemos que son un niño de caciquismo e duplican as funcións das demáis administracións pero o PP se resiste a eliminalas.
En relación aos impostos Especiais, reprochou ao Goberno que insistan na liña de gravar impostos indirectos que paga todo o mundo. E foi moi crítico coa desindexación do IPC porque supón desligar definitivamente as rendas de traballo ou as pensións do indicador que mide o nivel de vida. Así que continuarán a rebaixar salarios. E censura que sigan cargando parte do axuste bancario sobre os aforradores através do Imposto de Depósitos.
Non ofrecen futuro á xente
Censurou o anuncio da Vicepresidenta Primeira do Goberno dunha nova lei de Caixas tendente á súa total profesionalización. É dicer, a morte absoluta do pouco que queda das Caixas e a súa total conversión en banca privada.
En conclusión, o portavoz nacional do BNG afirma que todo vai cambiar para non cambiar nada, é dicer, as súas políticas económicas van seguer igual co cal se vai agravar aínda máis a crise: Desemprego, máis impostos, menos salarios e pensións e todo para salvar a banca como recomenda a troika Non ofrecen unha saída nen un futuro a unha sociedade que está ao límite de superviviencia. E continúan sendo os alunos máis disciplinados coas doutrinas de Merkel. Ademáis, engadiu que o discurso triunfalista da Vicepresidenta choca coa realidade de parálise económica, incluso cunha maior recesión. Un Goberno que se corrixe a si mesmo porque os Orzamentos para este ano son papel mollado.