Rosana Pérez exixe a Ana Pastor que solucione as deficiencias na seguridade do Eixo Atlántico
A deputada do BNG dirixe unha batería de preguntas a Fomento debido ás advertencias que o departamento de Seguridade de Renfe lle trasladou ao colectivo de maquinistas por detectar 11 puntos singulares no Eixo Atlántico entre Santiago e Vigo. Moitos destes puntos adoecen de sinais pouco visíbeis ou pola falla de sinais.
Rosana Pérez amosa o seu estupor porque despois do acontecido coa traxeida de Angrois se pida aos maquinistas que repasen os documentos para comprobar e resaltar os cumprimento das velocidades e marcar referencias para iniciar freados ou reducións na velocidade do tren.
Se hai puntos singulares que os solucionen
A parlamentar nacionalista alude aos 11 puntos singulares marcados por Renfe sinalando que é a evidencia de que estamos perante unha serie de deficiencias en relación á seguridade no Eixo Atlántico que ao noso modo de ver, terían que terse subsanado en lugar de transferir toda a responsabilidade a un colectivo de traballadores. Rosana Pérez denuncia que estamos a falar de problemas de sinalización, de carencias de sinais ou de problemas polo perfil do tendido.
E ironiza sobre as presas por inaugurar servizos ferroviarios que levan ao Ministerio de Fomento a obviar a necesidade de dispór do sistema de seguridade máis avanzado, que é o ERTMS. Critica que nada se aprendera do terríbel sinistro do Alvia en Angrois. O Ministerio tropeza de novo na mesma pedra e ten a coraxe, após do acontecido, de traspasar a responsabilidade sobre a seguridade aos maquinistas.
Aceitou Renfe estes riscos?
Rosana Pérez reprocha que o Ministerio asegure que non existen riscos para a seguridade cando debemos pór de relieve que a lexislación indica con clareza que os riscos do ADIF que exporte ao Operador Ferroviario (Renfe), sin minimizar o seu nivel de risco, debe ser aceitado ou non aceitado por este último. Á luz dos feitos, deducimos que Renfe está asumindo e aceitando os riscos. Sendo así, debería informar aos usuarios.
A deputada do BNG exixe a Fomento que solucione as deficiencias na sinalización no Eixo Atlántico. É posíbel que se poña máns á obra? Como se explica que se detecten deficiencias e carencias na sinalización e non se resolvan? Como se explica que se confíe todo ao factor humano?.
Ademáis, a parlamentar nacionalista pregunta ao Ministerio cal é a avaliación de riscos de fallo humano en cada un deses puntos singulares. É un risco aceitado e asumido por Renfe? Está recollido por escrito? De ser así, Quen o aceitou?. Reprocha a Fomento que lle poidan as presas: Non está o Ministerio deixándose levar polas presas por inaugurar servizos ferroviarios en tempos eleitorais? Non se deberían extremar as precaucións no tema de seguridade dado o acontecido co accidente de Angrois?.