Rosana Pérez defende a sanidade pública universal no acto promovido pola ONG Médicos do Mundo
A deputada nacionalista interviu neste acto en representación do BNG, unha das formacións políticas asinantes da Declaración Institucional pola Universalidade do Dereito á Saúde promovida por Médicos do Mundo, e que contou coa participación de todas as organizacións políticas asinantes así como multitude de plataformas, asociacións e organizacións relacionadas co ámbito da sanidade e outros eidos sociais.
Na súa intervención, Rosana Pérez foi especialmente crítica co Real Decreto Lei 16/2012 aprobado polo Goberno do PP nesta lexislatura e que conlevou a perda de dereitos sanitarios e excluiu do acceso universal á sanidade pública a moitas persoas. Neste sentido, Rosana Pérez tivo palabras de recoñecemento para os profesionais da sanidade pública que están a facer obxeción de conciencia con este Real Decreto e continúan atendendo por igual a todo o mundo nos servizos de saúde.
Asemade agradeceu o importante labor que están a realizar asociacións e organizacións sanitarias galegas en moitos concellos.
Subliñou a deputada do BNG que o BNG, desde sempre, reivindicou unha sanidade pública, gratuita e universal e así consta nos nosos sucesivos programas eleitorais. Recriminou ao PP que se adicase a pór en marcha o seu corpus ideolóxico tamén neste piar do Estado de Benestar que é a sanidade: O PP con ese Decreto inseriu o seu modelo ideolóxico consistente nunha sanidade para ricos e unha para os probes baseada na beneficencia.
Deixou clara a sintonía do BNG co Manifesto hoxe presentado que demanda a retirada do lesivo Real Decreto do Goberno de Rajoy e un compromiso en defensa da sanidade pública de calidade.