Rajoy ten que deixar o electoralismo e dar a cara sobre os recortes brutais que ten pensado aplicar
O candidato do BNG á presidencia da Xunta, Francisco Jorquera, esixiu este domingo a Rajoy que dea a cara para explicar os drásticos e brutais recortes que pensa aplicar en vez de asistir a Santiago ao acto de entrega do Códice, un acto electoralista máis propio de tempos pretéritos, de subordinación do poder civil ao relixioso.
Estado intervido
Para o candidato nacionalista, estas medidas que Rajoy non se atreve a explicitar, demostran que a o estado español é un estado intervido a efectos prácticos, pois se van aplicar as mesmas medidas e recetas que se adoptaron, por exemplo, en Grecia, e que conduciron a este País á situación de derrumbe na que se atopa, unha situación insostíbel para a súa sociedade.
As medidas que está pondo sobre a mesa o goberno do Estado van empobrecer aínda máis ás clases medias e expulsar do sistema a parte da poboación
Visto isto -engadiu- é necesario un cambio de rumbo nas políticas públicas, para que as persoas estean por riba dos dictados dos mercados, das esixencias dos grandes poderes económicos.
Referendum
Neste sentido, Jorquera apelou á que se lle dea voz aos cidadáns, que teñan dereito a opinar a través dun referendum tanto polos recortes como polo feito de que Rajoy foi incumprindo todos e cada un dos seus compromisos, pois ningunha das medidas que está a adoptar está incluida no seu programa.
O candidato nacionalista aproveitou a súa visita á Fortaleza de Goián, unha actuación do concello de Tomiño, gobernado polo BNG con maioría absoluta, que se acaba de inaugurar recientemente, para demostrar como é posíbel pór en valor o patrimonio galego.
Esta acuación exemplar -dixo- contrasta coa deixadez do goberno da Xunta na asunción das súas competencias, á hora de garantir a seguranza dos bens patrimoniaias galegos, nomeadamente pezas como o Códice.
Sumisión do poder civil ao relixioso
Jorquera lamentou actos como o celebrado hoxe en Santiago, de entrega do Códice por parte de Rajoy, que, na súa opinión, son máis propios de tempos pretéritos que de tempos democráticos.
A imaxe de hoxe foi unha imaxe de subordinación do poder civil ao poder relixioso, dixo, ao tempo que pediu que se abra expediente á Igrexa polo acontecido co Códice e se tomen as medidas necesarias para que a custodia deste tipo de obras depende dos poderes públicos, que aseguren o seu coidado e o seu acceso ás visitas e aos historiadores.