O PP opónse á moción do BNG sobre Navantia e reprocha que "o BNG leve iniciativas así ao Pleno"

O PP deixou claro na súa intervención por boca da deputada Tristana Moraleja, que non vai apoiar a moción da deputada do BNG no Congreso, Rosana Pérez, cunha serie de medidas para garantir o futuro dos estaleiros galegos de Navantia.

Na súa intervención Rosana Pérez puxo de manifesto que a situación extrema pola que atravesan os estaleiros galegos de Navantia é consecuencia das políticas dos diferentes Gobernos centrais. “Agora, nada indica que se vaia mellorar, todo o contrario, continúa a diminución da capacidade produtiva, o deterioro laboral e a redución de traballadores”.

Subliñou que a “nefasta xestión de Navantia” e a caída de contratos desde o ano 2006. Reprochou ao Ministro Montoro a súa “intervención ambigüa, puxo en evidencia que non hai contratos confirmados, só existen futuríbeis e criticou a falla dun verdadeiro Plan Industrial.

“Tampouco hai un Plan de diversificación a pesar de que se anuncia en cada campaña eleitoral, igual que o tema do dique flotante que se emprega para non falar das cuestións de fondo”, enfatizou.

“A nefasta xestión de Navantia”

A deputada do BNG pasou a explicar no Pleno algunhas das cuestións de fondo que afectan a Navantia na Ría de Ferrol: “debería haber actuacións políticas intensas para levantar o veto que pesa sobre Navantia Fene para a construción civil. É o único xeito de ter suficiente carga de traballo” e advertiu ao Goberno que “se pode facer porque o Acordo entre a UE e o Goberno español de 2005, recolle que se poden revisar os compromisos se se producen novidades. Acaso a situación laboral de Navantia non é suficiente para revisar dito Acordo?”, preguntou Rosana Pérez.

Rosana Pérez tamén aludiu á situación económica da empresa: “os ingresos de explotación son inferiores aos custes de produción desde hai anos. E se contempla unha forte caída desde o ano 2012, para o que non vale cun simple flotel”. Neste sentido, salientou o feito de que “os únicos centros que obtiveron resultados positivos foron os de Navantia Ferrol, e se houbese carga de traballo os resultados terían sido aínda mellores”.

Criticou a “negativa actuación na xestión da empresa, por iso é tan escandaloso que se pretenda atribuir aos traballadores as consecuencias desta errática xestión”. Alertou dos intentos de continuar coas políticas de reestructuración porque “non van mellorar a situación da empresa”.

Rosana Pérez enumerou as medidas que o BNG propón na moción como o de crear Unidades Territoriais cunha Direción única e competencias completas de xestión e responsabilidade propia, facilitar a participación da Xunta no Consello de Administración de Navantia, consolidar a situación financeira da empresa, aprobar unha partida para impulsar a construción do dique flotante, levantar o veto, entre outras propostas.

A deputada do BNG amosou o seu dispór a negociar acordos cos grupos que presentaron emendas e acordar unha transaccional, mais desbotou a emenda do grupo popular por reduccionista e falta de propostas. A moción será votada cando remate o pleno de mañá xoves.

O PP considera que Montoro deixou todo “claro” sobre carga de traballo para Navantia

Propostas que o PP por boca da deputada galega, Tristana Moraleja, rexeitou expresando a “súa estraneza” de que o BNG presentase esta moción despois da resposta do Ministro Montoro á deputada do BNG “cando quedou todo moi claro”. A intervención da deputada do PP foi unha copia da realizada por Montoro, con especial mención a flotel. En relación ao dique flotante, moveuse na mesma linguaxe ambigüa e confusa, sinalando que “houbo unha consulta previa antes de tomar unha decisión” pero seguiu a liña ministerial de non aclarar se houbo ou haberá unha consulta formal ante a UE.