Miranda asiste en nome do BNG ao congreso do pro curdo Partido Democrático do Pobo (DHP)
A portavoz do BNG en Europa, Ana Miranda, participa en Ankara no congreso anual que esta fin de semana celebra o Partido Democrático do Pobo-HDP, formando parte da delegación da formación Alianza Libre Europea (ALE).
Esta forza política pro curda é o terceiro grupo no Parlamento turco con 59 escanos dun total de 550, despois da celebración das pasadas eleccións de novembro e tras a súa fundación en 2012 como continuador do difícil traballo dos numerosos partidos curdos de esquerdas que o precederon. Está claramente a favor da democracia participativa, dos dereitos das minorías nacionais, do ecoloxismo e da igualdade.
O HDP mantén relacións en Europa coa Alianza Libre Europea, partido político europeo defensor da autodeterminación dos pobos e nacións sen Estado, ademais doutras forzas europeas de esquerda.
Ana Miranda manterá en Ankara unha serie de reunións cos portavoces do HDP Selahattin Demirta? e Figen Yüksekda?, así como con diferentes deputadas e deputadas, nas que vai transmitir a solidariedade do BNG coa causa curda e a colaboración da formación nacionalista nas denuncias internacionais pola constante vulneración de dereitos humanos por parte do Goberno turco contra o Pobo curdo, agravada nestas últimas semanas.
Neste sentido, o Bloque denuncia o recrudescemento da violencia do Goberno turco durante as últimas semanas no Curdistán e a ocupación de diversas cidades curdas polo exército turco, que empregou armas de guerra en zonas poboadas por civís causando moitas vítimas, entre elas 3 políticas integrantes da Marcha Mundial das Mulleres.
Amais da detención arbitraria de varios militantes do HDP, as sedes do partido foron rexistradas pola policía en Istambul e outras cidades, atacadas por grupos de extrema dereita nos últimos meses. Tamén foron detidos moitos dos intelectuais que asinaron un manifesto contra os ataques e bombardeos das últimas semanas.