A Lei do BNG para prohibir a munición con chumbo na caza acada a unanimidade da Cámara
A Proposición de lei defendida pola deputada do BNG, Ana Pontón continuará co trámite parlamentario co apoio unánime da Cámara galega
Pleno.- A parlamentaria do BNG, Ana Pontón defendeu unha Proposición de Lei destinada a reformar a lei caza de Galiza co fin de prohibir, en todo o territorio galego o uso da munición que conteña chumbo .
A Proposición de lei nacionalista contou coa unanimidade da Cámara para a súa toma en consideración polo que continuará co trámite parlamentario ata a súa aprobación definitiva.
Ana Pontón agradeceu o apoio á proposta de Lei do BNG e cualificou de parte positiva a toma en consideración da modificación legal porque pretende avanzar na mellora do medio ambiente.
A deputada agradeceu tamén de maneira especial o papel da Asociación Animalista Libera na elaboración e impulso da proposta de lei que hoxe inicia o trámite parlamentario e persegue a erradicación desta munición por contaminante e perigosa para o medio ambiente e que representa un grave problema para a conservación medioambiental.
Hoxe, dixo, damos un pequeno paso cara unha xestión cinexética cunhas prácticas sexan máis respectuosas e ecolóxicas. Esperamos, dixo, que ao final do proceso de tramitación da lei, a valoración sexa positiva.
Tribuna sen convidad@s do BNG
A parlamentaria aludiu a ausencia de convidados e convidadas do BNG na tribuna do público para presenciar o debate da lei, circunstancia que achacou a decisións arbitrarias e represión que impediron que o Grupo parlamentar do BNG puidera formalizar os convites. Lamentamos, dixo, que a posición do Grupo Popular maioritario e o da propia presidencia nos alonxen como institución do pobo en troques de ser unha institución democrática e transparente onde calquera persoa poda asistir aos plenos sen atrancos e censuras que buscan o descrédito da política