Jorquera: “Os orzamentos para o 2015 son continuístas e clientelares”

O nacionalista acusou á Xunta de elaborar unhas contas destinadas a “regar os concellos gobernados polo PP”, ás portas dunhas eleccións municipais

Tras a Xunta de portavoces, celebrada hoxe no Parlamento galego, o portavoz do grupo parlamentario do BNG, Francisco Jorquera cualificou os Orzamentos para o 2015, de “clientelistas” e destinados a “regar os concellos gobernados polo PP”.

O nacionalista salientou que Vicepresidencia medra 34 millóns incrementando as partidas para Administración local “ás portas dunhas eleccións municipais”.

Jorquera remarcou que tamén aumentan os gastos en asesores, (2,2% ), mentres baixan os investimentos en Medio Rural, Sanidade, Cultura e Lingua, “son uns orzamentos continuístas, sen deseño estratéxico para xerar emprego e no camiño de consolidar unha Galiza máis pobre e desigual”, manifestou.

O parlamentario tamén asegurou que as contas para o 2015 estiman un crecemento do 2% cando a Xunta tivo que rebaixar as súas previsións de crecemento para o peche do 2014, en definitiva, como di a foliada do Celta, “sempre andas dicindo para o ano que ven...”. A Xunta, afirmou, “non cre nas súas propias previsións de crecemento”.

Propostas do BNG para a vindeira sesión plenaria

Sobre as cuestións que serán debatidas na vindeira sesión plenaria dos días, 28 e 29, o portavoz do BNG resaltou a Proposición de lei do BNG referida á Reforma do IRPF para resolver a discriminación d@s emigrantes retornados á hora de tributar polas pensión percibidas doutros Estados.

Por outra banda o BNG reclamará, a través dunha moción, o compromiso do Goberno coa construción naval civil en Galiza revogando o acordo do Consello de Ministros relativo á dependencia de Navantia co Ministerio de Defensa.

Asemade, pedirá rexeitar o Tratado Trasatlántico de Comercio e Investimento negociado entre Europa e EE.UU con medidas que poñen en risco os servizos públicos, medio ambiente e dereitos sociais.

Os pagamento das indemnizacións do FOGASA a traballador@s galegos de empresas en creba, que o Goberno exerza as súas competencias para rematar coa permanencia de Ence-Elnosa e a pregunta ao Presidente sobre “ presunta malversación de fondos públicos” en cursos de formación subvencionados pola Xunta de Galiza serán debatidos na vindeira sesión plenaria.

Sobre a creación dunha comisión de investigacións sobre a “presunta fraude de cursos de formación”, Jorquera lembrou que resulta moi chamativo que dente o ano 2012 houbera indicios desta trama e que entre as persoas interrogadas figurara o exdirector xeral de Traballo que dimitiu un día antes de ser citado pola policía e engadiu que o PP solicitou a creación dunha comisión de investigación no Parlamento andaluz polo escándalo dos ERES. No vindeiro pleno, dixo, saberemos se en Galiza, Núñez Feijóo “vai facilitar a comisión e depurar responsabilidades”.