Jorquera: "O goberno do BNG será un dique fronte ás desigualdades e a inxustiza"
Francisco Jorquera interveu esta mañá ante o Consello Nacional do BNG, a primeira reunión despois do verán do máximo órgano do BNG entre asembleas.
Feijoo é cómplice dun goberno que tolera o roubo das preferentes mentres entrega 4.500 millóns a Bankia
O candidato nacionalista afirmou que a decisión de Feijóo de renunciar a seis meses de lexislatura, pese a contar co sustento dunha maioria parlamentar, é a mellor evidencia do esgotamento do seu proxecto, da súa manifesta incapacidade para facer fronte aos problemas do noso país. é todo un recoñecemento do seu fracaso.
Ademais, denunciou que esta decisión representa tamén o seu último acto de sumisión de Feijóo a Rajoy e ao seu goberno, que tolera o roubo de até o 70% dos aforros dos afectados polas preferentes mentres entrega 4.500 millóns de fondos públicos a Bankia.
Feijoo méntelle á sociedade galega para intentar reter o goberno
O candidato do BNG á presidencia da Xunta tamén advertiu de que Feijóo quere aplicar en Galiza a mesma táctica que utilizou Rajoy para chegar á Moncloa, quere, á desesperada, intentar reter o goberno, ocultando o seu verdadeiro programa, mentíndolle a sociedade galega.
A este respeito, recomendoulle que en política, non se pode gobernar sempre sustentándose na mentira, aínda que esta se parapete nun inmenso muro de propaganda.
Jorquera reta a Feijóo a debater sen escusas
Fronte a iso, Francisco Jorquera retou eu hoxe mesmo ao Partido Popular a debater ante toda a sociedade galega sobre o efecto Feijóo, a debater sobre os efectos da súa política que levaron a que Galiza agora, decrece máis que a media estatal e a que nunca na historia de Galiza houbera tantas persoas sen traballo, ou a que a débeda pública de Galiza pasara con Feijoo de 3.200 a 8.000 millóns de euros.
A herdanza de Feijoo -resumiu- é un país sumido nunha profunda crise económica, política e social: este é o verdadeiro efecto Feijóo, o pior presidente que tivo Galiza.
Galiza necesita un Goberno que sexa un dique fronte ás desigualdades e a inxustiza
Ante esta situación, o candidato do BNG á presidencia da Xunta afirmou que Galiza non necesita unha simples alternancia de goberno, que foi a que houbo en Madrid cando gañou Rajoy.
Pola contra, defendeu que Galiza necesita dun goberno que lle plante cara aos recortes. que sexa un dique a fronte ás desigualdades e a inxustiza, fronte ao centralismo e a perda de democracia, que impulse a economía produtiva para crear emprego.
O candidato nacionalista concluíu a súa intervención facendo un chamamento a transformar o descontento social maioritario en enerxía alternativa que representa o BNG para facer posíbel o cambio real que Galiza necesita.
http://youtu.be/Cv-i83P6Vyk