Feijoó terá que dar contas na última sesión de control da súa incapacidade para combater o paro
Ana Pontón lamenta o veto do PP ao debate no próximo pleno de dúas Iniciativas Lexislaturas Populares (Preescolar na casa e SOS Sanidade Pública), a investigar a xestión das caixas e a habilitar o mes de Xullo para o traballo parlamentar, cando a situación económica é tan crítica e se van adoptar decisións tan trascendentais nese período, que van afectar a Galiza, sen que poidan ser contestadas dende a Cámara.
Así o explicou a voceira nacionalista na Cámara, Ana Pontón, quen denunciou a situación dramática e de verdadeira necesidade que sofren milleiros de galegos e galegas, cos que o presidente da Xunta asumira o compromiso de levar a Galiza pola senda da creazón de emprego.
Feijóo contaba aprobar con nota e suspende, pois o seu combate contra o paro se salda con Galiza entre as comunidades que máis destrúe emprego
Ana Pontón, na rolda de prensa posterior á Xunta de Portavoces, lembrou que Feijóo non só asinou un contrato persoal e moral cos cidádáns neste sentido senón que, no seu momento, asegurou que rendiría contas do seu grao de cumprimento, agoirando aprobar con nota ao final da lexislatura.
Mais a realidade engadiu a deputada- é que máis ben suspende, porque o comportamento do paro en Galiza é moi negativo, sendo unha das comunidades onde máis emprego se destrúe, sumando xa 276.608 as persoas que non teñen traballo.
A parlamentar pedirá, por tanto, na sesión de control que Feijóo que asuma a súa responsabilidade na Cámara, responda sobre os incumprimentos de dito contrato e aposte pola posta en marcha dunha política que xere emprego e apoie a capacidade produtiva do País.
Futuro do sistema financieiro
Para a deputada nacionalista, o futuro do sistema financieiro galego é outra das asignaturas pedentes de Feijóo nesta lexislatura, de aí o debate dunha moción nacionalista reclamando de novo a transferencia a Galiza da participación do Frob en NGB.
A iniciativa tamén busca a recuperación íntegra do 100 por cen dos aforros dos afectados pola fraude das preferentes, a devolución das indemnizacións millonarias dos ex directivos das caixas e a investigación da xestión que levou a estas entidades á situación actual.
Non é de recibo que os ex directivos das caixas comparezan antes no Congreso que no Parlamento galego
Neste sentido, Pontón lamentou o veto do PP, máis unha vez, a que o Parlamento acolla un debate sobre a necesidade de crear en Galiza unha comisión de investigación e criticou que o faga con argumentos cínicos e falaces.
Para a parlamentar, non é de recibo que os ex directivos das caixas vaian comparecer antes no Congreso que en Galiza, cando o goberno da Xunta é quen tiña a tutela sobre estas entidades.
Veto ás ILP SOS sanidade Pública e Preescolar na casa
Ana Pontón considerou que con esta decisión Feijóo está asumindo que é cómplice en todo o acontecido coa nefasta xestión das caixas e se está devaluando o papel do Parlamento, unha actitude de menosprezo que tamén poidemos comprobar hoxe co veto do PP ao debate de dúas iniciativas lexislativas populares.
Trátase, explicou a voceira nacionalista, das ILP en defensa de Preescolar na Casa e a da plataforma SOS Sanidade Pública, que contan cun importante apoio cidadán, mais o PP non quere escoitar o que ten que dicir a xente e prefire menoscabar a democracia.
Regulamento
A parlamentar denunciou, como outro exemplo da intolerancia do PP, que non se abordara a creación dunha ponencia para estudar a reforma do regulamento da Cámara, con aportacións de todos os grupos, e que non se habilitara o mes de Xullo para seguir traballando, malia a situación económica actual e as importantes decisións que se van adoptar neste período e que van afectar a Galiza sen que se lles poida dar resposta dende a Cámara.
Feijóo aínda non desvelou os termos do contrato con Pemex para o naval nin da proposta do novo Tax lease
Orde do día
Sobre os restantes asuntos da orde do día, Pontón salientou unha proposición non de lei sobre o futuro de Alcoa e dúas iniciativas sobre o sector naval (interpelación e pregunta), pois remata o prazo comprometido por Feijóo para saber se vai haber carga de traballo ou non para Navantia e non se coñece aínda nin a proposta de tax lease remitida a Bruxelas nin os termos do contrato asinado con Pemex.
O futuro do sector eólico, a privatización do servizo de salvamento marítimo, a supresión de prazas de ensino para o próximo curso e a redución de camas nos hospitais no verán son outros dos temas que levarán a pleno os nacionalistas no próximo pleno.