O director da CRTVG recoñece ao BNG silenciar a manifestación de Monforte nos TXs

En responsta a unha pregunta formulada pola deputada do BNG, Montse Prado, Sanchez Izquierdo recoñece a omisión de información nos TXs da TVG da manifestación de Monforte  e responabiliza a un profesional do acontecido

Montse Prado criticou “a excesiva” presenza do PP e Goberno galego nos informativos da RTVG mentres son silenciados, de maneira “sistemática”, os grupos da oposición

No transcurso da comisión de control da CRTVG, a deputada nacionalista Montse Prado formulou dúas preguntas parlamentarias sobre: a omisión da valoración dos grupos da oposición nos informativos da TVG os días 3 de xaneiro e 3 e 4 de febreiro en relación aos datos do desemprego e a contratación de Isabel Pantoja no programa “Luar”, incursa nun proceso de lavado de cartos e fraude a Facenda.

Os informativos da TVG non deron conta da manifestación de Monforte en defensa da Sanidade Pública

No transcurso da pregunta sobre a emisión dos datos do paro dos grupos parlamentarios, Montse Prado criticou que a RTVG de “maneira sistemática” non emita as comparecencias e propostas da oposición sobre políticas de emprego ás que sumou, o decreto do plurilinguismo, os comedores escolares ou das participacións preferentes.

Neste sentido, engadiu que “deciden vostedes o que queren trasladar sobre a nosa actividade política” silenciando o que non lle interesa ao Partido popular como aconteceu o pasado día 19 en Monforte.

A manifestación de Monforte, dixo, congregou a 9.000 persoas que defendían as áreas sanitarias da Mariña e Monforte contra a decisión da Xunta de centralizar estes servizos en Lugo. A través da Área de Xestión Integrada e sobre todo , engadiu, defendían a Sanidade pública, “na TVG non apareceu ningunha imaxe nin información desta multitudinaria manifestación en ningún dos telexornais”.

Sánchez Izquierdo recoñece o silenciamento da manifestación

Pola súa parte, o director xeral de CRTVG, Alfonso Sánchez Izquierdo recoñeceu o feito e asegurou que foi produto “da descoordinación e falta de dilixencia dalgún profesional”. O director do ente afirmou que porá en marcha as medidas necesarias para que non se volve a repetir.

Para a deputada do BNG, o director da Compañía de RTVG “non se responsabiliza” dun feito que cualificou de “caso sangrante” e falta de respecto aos lugueses e luguesas que pagan este medio público.

A parlamentaria lamentou que a omisión de información na TVG sempre coincida coas protestas da cidadanía e traballo político dos grupos parlamentarios, vostedes, dixo, informan dos incidentes dos afectados das participacións preferentes pero non informan das consecuencias deste problema, vostedes, “seguen facendo fincapé nas valoracións de Feijóo e Rueda e non lle permiten aos afectados desta “estafa masiva” pronunciarse nun medio que pagamos todos os galegos.

A TVG seguirá contratando a persoas incursas en procesos xudiciais

Para a deputada do BNG, a contratación da tonadillera Isabel Pantoja no Programa “Luar”, transmite á sociedade a mensaxe de “todo vale” é da igual se a artista está vinculada á operación “Malaia”, acusada de branqueo de cartos e fraude a facenda pública, pendente de sentenza ou se ingresa no cárcere por estes delitos.

Prado considerou que resulta “unha falta de respecto” á cidadanía galega que un medio de titularidade pública contrate “con fundos públicos” a Isabel Pantoja porque, na súa opinión, a TVG debe transmitir outro tipo de valores baseados na ética. A presenza dunha persoa procesada por defraudar a facenda pública lanza unha mensaxe de impunidade de que “aquí non pasa nada”.

O director xeral da CRTVG respondeu á deputada que a contratación de Isabel Pantoja ven marcado por un “criterio de audiencia” e que a TVG seguirá coas contratacións que considere que oportunas.

A parlamentaria lamentou que a loita por unha maior audiencia permita que calquera día podamos ver na tele galega “a un maltratador” ou persoa procesada por outro calquera delito, concluíu.